De Psalmen Dauids

Den xxv. Psalm.

Is een schoon ghebet, dat ons Godt regeren, leyden onse sonden vergheuen, troosten, ende verlossen wille.

1

NA v Heere verlangt my seer
Op v Godt is mijn hopen,
En laet my niet te schanden Heer'
Worden, v gunst doet open:
Op dat hun

[p. 69]

 

mijn Vianden vry

 

Niet en verheughen ouer my,

 

End' niet soo hardt en nopen.

2

Want die en worden t'schanden niet,
Die ws (O Godt) verwachten:
Maer te schanden end' in t'verdriet
Comen die v verachten.

Heer', wijst dijn weghen uwen knecht,

End' leert my uwe paden recht:
Brengt die in mijn ghedachten.

3

Leydt end' leert my v waerheyt claer:
Want ghy helpt my warachtich,
Daegh'lijx verwacht' ic ws voorwaer.
Ghedenct, O Godt almachtich,

Aen uwe bermherticheyt groot,

End' oock aen uwe goetheyt bloot,
Die oyt was euen crachtich.

4

Ghedenct niet de sond' mijnder ieucht,
Noch all' mijns ouertreden:
Maer Heer' ghedenct mijns doch met vreucht
Na v bermherticheden,

Om v deucht will'. De Heer' is goet:

Dus hy den sondaers weten doet
End' wijst den wech des vreden.

5

D'Ellendighe die leydt hy recht,
End' leertse zijne weghen.

[p. 70]

 

S'Heeren Paden zijn goet end' slecht,

 

Tot waerheyt gansch gheneghen,

 

Voor den ghenen die zijn verbont,

 

Sijn Ghetuychenis t'alderstont

 

Houden vast end' te deghen.

6

Om dijns Naems wil, ghenadich weest
(O Heer') mijnder misdaden,
Die daer groot zijn: My doch gheneest,
Door t'werck uwer ghenaden.

Wie is die, die den Heere vreest?

Hy sal hem onderwijsen meest,
Den besten wech hem raden.

7

Sijn Sile sal in goeden vast
Woonen, end' van ghelijken
Soo sal sijn Saet t'Lant sonder last
Besitten, als de rijken.

S'Heeren Secreet onder dien is

Die hem vreest: Sijn Verbondt ghewis
Dat laet hy voor hem blijken.

8

Mijn oogh' op den Heer' altijt let:
Want hy die sal ghestadich
Mijnen voet trecken wt den Net.
Keert v tot my Ghenadich:

Ick ben Ellendich end' Eensaem.

Groot is mijns Herten anxt end' blaem:
Voert my wt Nooden schadich.

9

Siet aen d'ellend', het iammer mijn:
Vergheeft my all' mijn sonden.
Merct, dat mijnder vyanden zijn
Och Godt, soo veel beuonden,

Die my haten vermetelijck.

[p. 72[71]]

 

Bewaert mijn Siel' discretelijck,

 

Verlost my t'alder stonden.

10

En laet my niet ter schanden gaen:
Want ic op v betrouwe.
Slecht, ende recht (na v vermaen)
Dat behoed' my, soot souwe,
Want ic, o Godt, verwacht ws seer:
Israel verlosse de Heer',
Wt allen Noot end' rouwe. 1. Gloria.