De Psalmen Dauids

[p. 20]

Den v. Psalm.

Is een gebet tegen de vianden der kercken, ende tegen de valsche Leeraers, ende het is eenen troost dat ons Godt in zijn woort onderhouden ende leyden wil.

1

VErhoort mijn stem', mijn reden merct,
Hebt op mijn kermen achte,
Mijn Coninc end' Godt my versterct,
Tot v doen ic mijn clachte.
O Heere, ras mijn stem' verhoort,
Altijt heel vroech (soot welbehoort,
Mijn Godt ic v verwachte.

2

Want t'godloos wesen v mishaecht,
Valscheyt veracht ghy mede.
De Beroemers ghy van v iaecht,
Godt der gherechtichede:
Soo wie met boosheyt is belaen
En can gheensins voor v bestaen:
Hy vergaet in onvrede.

3

Ghy haet, Heer', elc die boosheyt doet,

[p. 21]

 

Logh'naers sult ghy versmaden:

 

Alle die dorstich zijn na bloet,

 

End' de valsche van daden

 

Sijn voor Godt eenen grouwel groot,

 

Hy wreect der onnooselen doot,

 

End' neemt-se in ghenaden.

4

Maer, Heer', ic wil gaen in v huys,
Op v groote goethede,
End' aenbidden sonder abuys
In v heylighe stede,
In vwer vreesen. Leydt my still',
Heer', om mijnder vianden will',
Dat ick niet en mis-trede.

5

Niet sekers is in hunnen Mont,
Hun ghemoet is t'onvreden:
Heel gheueyst is huns herten gront,
Inwendich valsch van seden:
Hun keel' is als een open graf:
Tot Huychelije hun begaf
Hun Tongh' vol gheueynstheden.

6

Beschuldicht-se Godt met der daet,
Willet doch van hun keeren
All' hun doen end' voornemen quaet:
Verstoot-se tot oneeren,
Om hun groot ouer-treden boos.
Want v onghehoorsaem altoos
Sijn sy, O Heer', der heeren.

7

Alsulken laet verblijden heel
Die hun aen v vast houwen,
Dat-se dijns roemen als hun deel,
Altijt vast op v bouwen,

[p. 22]

 

Want ghy de-selue wel beschermt,

 

End' v oock ouer hun ontfermt,

 

Die uwen Naem betrouwen.

8

Want ghy, O Heere, seghents' al
Die in t'Ghelooue leuen:
Al comt daer somtijts ongheual,
Ghy croont-se we'er verheuen
Met v ghenade als ghy wilt,
Als met eenen strijtbaren schilt:
Sulx al cunt ghy hun gheuen.