Logo DBNL
Werken. Deel 1: Gedichten (1875)

Werken. Deel 1: Gedichten

(1875)– Hadewijch–rechtenstatus Auteursrechtvrij

Vorige Volgende

XXVI.

 
Ic hebbe di geproeft
 
Dat mi genoecht
 
In de heymelecheit
 
Diere gedachten
 
Dat doet mi sachte
 
Dat si ontseit.
 
 
 
Alle ongelike
 
Ende haer houdet quite
 
Van alle dien
10.
Daer middelheit
 
Onser enecheit
 
Af mochte gescien.
 
 
 
Dijn herte es bedroeft
 
Dien nyet en genoegt
 
Dat mach vergaen
 
Alse dijn moet dinct
 
Yet dat ontwinct
 
Dijn blote instaen.
 
Hi die es
20.
Belonet hem des
 
In wien hi vendet
 
Dese gelike
 
Die hi heimelike
 
Ute enen ontbendet.
 
 
 
Die sonder wesen
 
Hoge lesen
 
Ende niet el en kinnen
 
Dan screfture
 
Ende creature
30.
Hem doet versinnen.
 
 
 
Menne maechs niet achten
 
Datse wachten
 
Ende calengieren
 
Want si en willen daerboven
 
Niemene geloven
 
Daer si faelgieren.
 
 
 
Voresien van binnen
 
Maect buten ontkinnen
 
Ende onachten
40.
Het es hem allene genoech
 
Die mach tgenoech
 
Sijns sceppers wachten.
 
 
 
Die wech es droeve
 
Die gheet ten genoeghe
 
Der creaturen
 
Ende so vol der mouden
 
Diere hem in houden
 
En connen hem gepuren.
 
Hoge merken
50.
In nederen werken
 
Es minnen quellen
 
Hoge wonen
 
In neder toenen
 
Blivet sonder vellen.
 
 
 
Die ontghonnen
 
Ende verwonnen
 
Hevet de minne
 
Dies hem veronnen
 
Dat zijs begonnen
60.
Sijn scalc van zinne.

Vorige Volgende