Logo DBNL
Werken. Deel 1: Gedichten (1875)

Werken. Deel 1: Gedichten

(1875)– Hadewijch–rechtenstatus Auteursrechtvrij

Vorige Volgende
tekstkritische noten

XII.

 
God si met u ende geve u al
 
Te minne dat men minnen sal
 
Ende te hatene dat te hatene es
 
Ende te alre waerheit sijn getes
 
Dient der waerheit waer ghi moghet
 
Ende spaert u vore en gene doget
 
Noch om gemac noch om ere
 
Daer omme doget gherne vele kere
 
Waerheit en hevet gheerre eere te doene
10.
Si es altoos in haer selven coene
 
Houdet enechleke uwe edelheit
 
Ende en spaerd ghenen arbeit
 
Sijt hen genadech die uwes behoeden
 
Troest de ghene die hen bedroeven
 
Dient der minnen in alre tijt
 
Ende settet in hare al uwen vlijt
 
Alle stoerme suldi dor haer nighen
 
Dor hare ere seldi swighen
 
Alse ghi overgherne spraect
20.
Alse ghi gerne sliept so waect
 
Alse gi gerne sweget so spreect
 
Ende niemanne en gebrect
 
An alle uwe zeden sijt in maten
 
In uwe doen in uwe laten
 
De scout die ghi gode sculdech sijt
 
Die geldet gherne in alre tijt.
 
Beide in hate ende in minnen
 
Dat pijnt u te leerne kinnen
 
Dat u ontmoet in uwen sin
30.
Daer in merct uwe scade ende uwe gewin
 
Wedter eenwille si so geest
 
Daer in leget subtijlheit alre meest
 
Het wanen liede sijn van gheeste
 
Geleidet hets eenwille alre meest
 
Si wanen ooc dattem dat doemt
 
Dat troest es ende van gode comt
 
Dit sijn drie subtile saken
 
Die de menschen meest volmaken
 
Van alden poenten die men pleget
40.
Die wijsheit die hier in leget
 
Es onbekint ende onverstaen
 
Want de menschen niet ontfaen
 
Ende willen pinen dor minnen ere
 
Si maken nu so vele kere
 
Ende belget u niet dattic dus spreke
 
Het doet trouwe niet u gebreke
 
Ghi wet een deel hoe ghi soudet leven
 
Al doets u roekeloesheit begeven
 
God si met u in alre tijt
50.
Ende make in hem al uwe delijt.

Vorige Volgende