Logo DBNL
Werken. Deel 1: Gedichten (1875)

Werken. Deel 1: Gedichten

(1875)– Hadewijch–rechtenstatus Auteursrechtvrij

Vorige Volgende

X.

 
God si uwe troest ter rechter minnen
 
Ende doe u hoege minnen bekinnen
 
Ende de waerheit die ghi hem sculdech sijt
 
Ende make in hem al uwen vlijt
 
Wildi beginnen dat werc der minnen
 
Soe seldi ane dat werc beginnen
 
Daers de gods sone ane began
 
Doe hi ons lenen quam een man
 
Alsoe hi levede seldi leven
10.
Ende alle vroude om hem begeven
 
Also hi de sine begaf sal elc de sine
 
Begeven die leven wilt in minnen fine
 
Ic bidde u dat ghi beghevet
 
Uwes selves ende ghi der minnen levet
 
In ellende ende in vernoye
 
Ic en wille niet dat u moeye
 
Dat u doer gode in minnen mescomt
 
Want alle pine dore minnen vroemt
 
Dat men om minne vele doget
20.
Op dat mens ghene mate en toget
 
Alse die bi minnen scinen in werre
 
Ende maken ocsuun ende toenen hem erre
 
Dats pine die niet en vromet
 
Noch niemanne bate af en comet
 
Want die ontspoede bedroeven minnen
 
Ende letten sere in allen zinne
 
Maer des hebdi cleine te doene
 
Ic woude ghi vroet wert ende coene
 
Jeghen gode strijt te makene
30.
Want het beneemt die soete sprake
 
Die minnen den gelieven gevet
 
Dat men ene ure niet met vreden en levet
 
Alsoe enech gevet uwe sinne
 
Te gode puerleke in rechter minnen
 
Dat ghi levet in soeten moede
 
Dat u sake en werde te goede
 
Dan allene god ende els niet
 
Want die van gode smaecs hevet iet
 
Wert hi gerenen van binnen
40.
In rechte gevoelne sier eneger minnen
 
Soen wert hem sake meer te goede
 
Maer alle dinc bitteren in sinen moede
 
Noch hi hem selven no helege no mensche
 
En valt hem meer als tenen wenschen
 
Hem sijn alle andere sake pine
 
Sonder omme minnen in minnen dienste te sine
 
Alle uren omme minne sterven ende doeyen
 
Ochte in gevoelne van ioeyen
 
Hier in moete u ghehogen
50.
Ende en late u te anderen saken doghen
 
Al seggic dus deo gracias
 
Ic en wiste nye wie de ghene was
 
Dien minne gaf blijscap ende vrie wege
 
Jeghen minne hebbic onseghe
 
Het es wel recht ic swighe der clagen
 
Dat ic van hare hebbe nachte bi daghe
 
Ic hebbe te cleinen coste gegeven
 
Om minnen daer ic vri bi mochte leven
 
Maer al en hebbic ghene vissche
60.
Ic en wille ghene vorsche
 
Noch ulieder besien
 
Vore wijn torsche
 
Alle hen hebbic ghene minnen
 
Ic en wille niet el
 
Weder dat si mi
 
Si goet ochte fel.

Vorige Volgende