Logo DBNL
Werken. Deel 1: Gedichten (1875)

Werken. Deel 1: Gedichten

(1875)– Hadewijch–rechtenstatus Auteursrechtvrij

Vorige Volgende
tekstkritische noten

VI.

 
Ic bidde gode datti u sinne
 
Voege in sine gewarege minne
 
Ende hi u met hem selven verlichte
 
Ende met siere dieper waerheit berechte
 
Want van mi saels u vele gebreken
 
Al wouddi oec om uwen orbore spreken
 
Die bi u sijn hulpen u cleine
 
Dus steet u met god te levene alleine
 
Met hem steet u best te doene
10.
Wildi vri leven ende coene
 
Ende in hem vervaen in alre tijt
 
So keert in hem al uwen vlijt
 
Ende merct ende leert in allen kinnen
 
De storme van gherechter minnen
 
Doet men u arch ochte goet
 
Alles blivet gheheel in uwen moet
 
Geheel blivet in allen saken
 
So suldi minnen kinnen ende smaken
 
Dat seggic u diet bat verstaet
20.
Dat rechte minne ende cranc baraet
 
Niet wel en moghen over een
 
Want minnen volget eerlec leen
 
Gerechte waerheit vaste trouwe
 
Vroude bliscap suete rouwe
 
Doeghet gherne ellendechede
 
Ende wet dat es der minnen sede
 
Ende staet met trouwen hen allen bi
 
Dien gi wet dat iet ter minnen si
 
In trouwen ende in sconen dienste
30.
Troest den ghenen die gi sijt vrienst
 
Ende die u in trouwen met trouwen sijn
 
Ic bevele u der minnen fijn
 
Ende ic bidde der edelre trouwen
 
Dat si uwe wesen moete bescouwen
 
Metten ogen van der minnen
 
Ende doe u al hare wesen kinnen.

Vorige Volgende