Logo DBNL
Werken. Deel 1: Gedichten (1875)

Werken. Deel 1: Gedichten

(1875)– Hadewijch–rechtenstatus Auteursrechtvrij

Vorige Volgende
tekstkritische noten

VII.

 
God si met u in alre tijt
 
Ende make in hem al uwe delijt
 
Buten allen vremden sorgen
 
Dies geve hi u de minnen te borge
 
Mi es leet dat ghi soe lettel cont bekinnen
 
Hoe gedane es hi in sier minnen
 
Dat soudic overgherne sien
 
Mocht mi bi iet te eer ghescien
 
Daer woudic overgherne omme pinen
10.
Ende met werken wel doen scinen
 
Ic bidde gode datti u spoet
 
Daertoe gheve ende uwen moet
 
Verlichte na sine edelheit
 
Ende moeten de werdecheit
 
Van siere naturen doen begeren
 
Ende in sine nature teren
 
Dat uwe wesen moete voeden
 
Ende te onser beider behoef behoeden
 
Ay lieve set al uwe gedachte
20.
In gods minne die u gewrachte
 
Der minnen beveelt al uwe wesen
 
Soe seldi alre qualen genesen
 
Ende pine en seldi niet ontsien
 
Noch vernoy in gheene dinc vlien
 
Op minne seldi u verlaten
 
Te rechte minnen te rechte haten
 
Van allen dingen sijt te vreden
 
Dats teken vander minnen seden
 
Dat ghi u beswaert so lichte
30.
Beneemt in meneghen scone gichte
 
Wildi u van binnen te gode verlaten
 
Ende houden u in caritaten
 
Soen saelt u niet ontbliven
 
Ghi selt u lief dan wel vercrighen:

Vorige Volgende