Logo DBNL
Werken. Deel 1: Gedichten (1875)

Werken. Deel 1: Gedichten

(1875)– Hadewijch–rechtenstatus Auteursrechtvrij

Vorige Volgende
tekstkritische noten

XLIII.

 
Alse ons ontsteet de winter sware
 
Die meneghen maket dat herte swaer
 
In dien tide es openbare
 
De feeste van allen heilegen bare
5
Ic hebbe ghedoget meneghen vaer
 
Maer boven al gheet mi die vaer
 
Hoe ic ter minnen sal gheraken.
 
 
 
Mine mach troesten niet de minne
 
Doer hare es mi al leet ghewin
10.
Si es de cracht van minen sinne
 
Want si es selve raet ende sin
 
Weder ic verliese ochte winne
 
Minne sal wesen mijn ghewin
 
Want si es selve ghenoech in allen zaken.
 
 
15
Ay minne docht u yet te tide
 
Het ware mi wel langhe tijt
 
Dat ghi bezaghet dat ellendeghe wide
 
Dat mi te lanc es ende te wijt
 
Ende ghi mijn herte maket blide
20.
Dat overselden es verblijdt
 
Sint ic na u ierst moeste haken.
 
 
 
Hoe gherne soudic sien die brieve
 
Hoe ghi minne, hebt in uwen brief
 
Uwe overherteleke lieve
25
Hoe ghi met minnen mint u lief
 
Dat ic mi minnen met hen verhieve
 
Want ic mi minne so nie en verhief
 
Alse si nu doen die uwes ghesmaken.
 
 
 
Ay fine minne allene pure
30.
Wanneer maecti mi u so puer
 
Dat ic u genouch si in nature
 
Want mi es al onnatuer
 
Mijn sijn alle andere saken suere
 
Maer boven al es mi dat suer
35
Dat ic u niet en can gheraken.
 
 
 
Ay sonder minne was ic ye noede
 
Want dat es alre node noet
 
Die sonder minne leven sijn doede
 
Maer boven al es dat ene doed
40.
Dat minne yet ieghen lief es bloede
 
Want volmaecte minne en was nie bloed
 
Sine sochte hare rechte die hare ghebraken.
 
 
 
Ay werde nature, minne fine
 
Wanneer maecti mine nature so fijn
45
Al uwer naturen genoech te sine
 
Want ic genoech al woude sijn
 
Soe waren al mine andere dine
 
Ende daertoe de uwe algader mijn
 
In wondere in uwen brant verblaken.
 
 
50.
Ay, minne, die sijn van uwen aerde
 
Voedet uwe nature na uwen aert
 
Die sine nature voer u iet spaerde
 
Hi bleve voer u nature ghespaerd
 
Maer dien uwe nature ye ure verclaerde
55
Hi blivet in uwe nature verclaert
 
So datti levet na volmaken.
 
 
 
Die wilt volmaect sijn hebbe oetmoede
 
Ende in al sinen vermoghene oetmoet
 
Soe comt hem al sijn were te goede
60.
Ende el en daedt hem nemmer goet
 
In allen gheluc in crachte in spoede
 
Want sine hadden meer ter minnen spoet
 
Die der minnen werc ane hen yet traken.
 
 
 
Men sal ooc in den ongevalle
65
Dore minne kiesen ongeval
 
Soe hulpen der minnen cracht hen allen
 
Daer si haer selven met es al
 
In hare grote wondere sonder ghetalle
 
Diere nemmermeer en wert ghetal
70.
Mach hi met minnen in gaen scaken.
 
Van minnen hebbic nachte bi daghe
 
Die mi bi nachte soude doen hebben dach
 
Begherte doet mi dat ic clage
 
Genoechte seghet mi altoos clach
75
Ende redene radet dat ict verdrage
 
Ende seghet dore minnen werc ende verdrach
 
Tote di dijn werc hulpet selve in wraken.
 
 
 
Bi redenen rade eest werken scone
 
In segghe niet dat het mach sijn verscoent
80.
De redene ghelonet ons grote loene
 
Maer minnen hevet selve te hant gheloent
 
Si toent bi uren sulken toene
 
Dien sise ophielde ende hadde ghetoent
 
Dat waren sachte die diepe staken.
 
 
85
Fiere herten doelt na minnen gronde
 
Die minne en hevet doch ghenen gront
 
Hare derven dat es haer ongesonde
 
Dies si te spade wert ghesont
 
Alse si naest hevet der minnen conde
90.
Soe wert hare minnen van ierst oncont
 
Soe doet begherte hare aderen craken.
 
 
 
Men sal al minnen omme minnen begeven
 
Hi es vroet die minnen omme minnen begevet
 
Alleens si sterven ochte leven
95
Omme minnen sterven es genoech gelevet
 
Ay minne ghi hebbet mi lange verdreven
 
Maer in welken soe ghi mi verdrevet
 
Ic wille u minne al minne waken.
 
 
 
Ay minnen wildi oec mijn sneven
100.
Hoe node ic ie hebbe ghesnevet
 
Ic wilt al doghen omme u ghenaken.
 
 
 
illustratie Alle die voer groetheit der minnen beven
 
Ende in hopen haerre groetheit leven
 
Die minnen sal hen wassen meer dan laken.

Vorige Volgende