Logo DBNL
Werken. Deel 1: Gedichten (1875)

Werken. Deel 1: Gedichten

(1875)– Hadewijch–rechtenstatus Auteursrechtvrij

Vorige Volgende
tekstkritische noten

XLI.

 
Al es dit nuwe iaer begonnen
 
Beide de maent ende dat iaer
 
Hier es bliscap noch cleine gewonnen
 
Want ons ghebreken die daghe claer
5
Ende andere bliscap menechfout
 
Die ionghe herten blide maket
 
Maer boven al hevet hi onghedout
 
Die minne beghert ende niet ne volsmaket.
 
 
 
Ay hem vernoeyt der dieper weghe
10.
Die verre ellende bezueken zal
 
Die doelt na minne ende hevet onzeghe
 
Hem doet wel wee sijn ongeval
 
Dat hi so vele van haer niet en weet
 
Daer hi bi seker wesen mach
15
Wat minnen lief si ochte leet
 
Hi (levet) wel dicken droeven dach.
 
 
 
Ay minne uwe abolghe ochte uwe hulde
 
En conne wi onderkinnen niet
 
Uwen hoghen wille ende onse sculde
20.
Waer omme ghi comt ochte vliet
 
Want bi cleinen dienste condi gheven
 
Uwe suete wondere in claerheit groet
 
Ende dat scijnt bi cleinen mesdoene vergheven
 
Ende dan geve di slage ende bittere doot.
 
 
25
Ay minne hoe sele wi gheleren
 
Wies ghi cont ende wies ghi gaet
 
Waer selen wi u ontgaen ghekeren
 
Ende die stoerme daer ghi ons bi verslaet
 
Ende bi wat crachten selen ons bliven
30.
Uwe suete wondere in wise clare
 
Dat wijt bi nederheiden niet en verdriven
 
Ocht sijn mach dat ons el gheware.
 
 
 
Ay in ellendeghen donkeren weghen
 
Laet ons de minne dolen wel
35
In meneghen stoerme sonder seghe
 
Daer si ons scijnt wreet ende fel
 
Ende selken gevet si sonder pine
 
Hare grote ioie menechfout
 
Dit sijn vore ons wel vremde scine
40.
Maer hen ghenoechte die kennen hare vrie gewout.
 
 
 
Ay minne in welken soe ghijt doet
 
Uwe henevaren scijnt abolghe
 
Maer die fier es ende vroet
 
Hem es beste datti met allen volge
45
In sueten in sueren in troesten in vare
 
Tote hi volweet wat ghi hem wilt
 
Alse ghi hem toent uwen wille so clare
 
Soe es sijn wee in vreden ghestilt.
 
 
 
Ay die verre verseilt hi moet ghedoghen
50.
Dat hem die avonture ghevet
 
Alsoe die mint moet nauwe poghen
 
Eer hi der minnen genoech vollevet
 
Hi moet willen in allen tiden
 
Haren hoghen wille ende anders niet
55
Ende els niet verdroeven noch verbliden
 
Wat hem anders meer ghesciet.
 
 
 
Ay die dus al mint der minnen wille
 
Daer mach sijn minne hare selven genoech
 
In hoghen gheruchten in nederen stille
60.
In al dies minne hem ye gewoech
 
Dit es ene de alre staercste veste
 
Ende die scoenste were die yeman sach
 
Ende die hoechste mure ende de grachte beste
 
Daer minne bi meer ontvlien en mach.

Vorige Volgende