Logo DBNL
Werken. Deel 1: Gedichten (1875)

Werken. Deel 1: Gedichten

(1875)– Hadewijch–rechtenstatus Auteursrechtvrij

Vorige Volgende
tekstkritische noten

XXXI.

 
Om grote minne in hoghen ghedachte
 
Willic wesen al mijn tijt
 
Want si mi met haerre groter cracht
 
Mine nature maect soe wijt
5
Dat ic mijn wesen al verpachte
 
In de hoghe geboert van haren gheslachten
 
Alse ic wille nemen vri delijt
 
Soe werpet si mi in hare hachte.
 
 
 
Ic waent wel liden sonder scade
10.
Dat ic in minnen dus ben bevaen
 
Wiltsi mi al de nauste pade
 
Van haren weghe doen verstaen
 
Alse ic mi wane rusten in hare ghenaden
 
Verstoermt si mi met nuwen rade
15
Dits een wonderlec verslaen
 
Soe si meer mint soe si meer lade.
 
Dit es wonder groot te verstane
 
Der minnen nemen ende hare gheven
 
Alse si mi gheeft troest te ontfane
20.
So werdet vruchten ende beven
 
Der minne bidde ic ende mane
 
Dat si de edele herten spane
 
Datsi in minnen doen dus leven
 
In nederen twifel in hoghen wane.
 
 
25
Troest ende meslone in enen persoen
 
Dats wesen van der minnen smake
 
Al levede die wise salemoen
 
Hi liete te ontbendene soe hoge sake
 
Wine werdens berecht in gheen sermoen
30.
Die sanc verhoget allen toen
 
Die tijt daer ic altoos na hake
 
Hevet in hem selven noch den loon.
 
 
 
Haken beiden merren langhe
 
Na dien tijt die selve es minne
35
Doet versmaden vremden ghemanghe
 
Ende toent verlies ende grote ghewinne
 
Fierheit radet mi dat ic hanghe
 
Soe vaste in minne dat ic bevanghe
 
Een wesen boven allen sinne
40.
Die toen verhoget alle sanghe.
 
 
 
Die toen die alle sanghe verhoghet
 
Dat meyn ic minne in hare gewout
 
Ic segs een luttel en doech ghetoeghet
 
Den vremden herten die sijn cout
45
Ende cleine omme minne hebben ghedoghet
 
Sine weten niet dat minne vertoeghet
 
Hare rike den fieren die sijn stout
 
Ende in die minnen werden ghesoeget.
 
 
 
Ghewout van minnen die al verwint
50.
Die es te verstane onghehoert
 
Ende bi in dole verre bekent
 
Ende een vrede die alle vreden stoert
 
Den vrede die men in minnen ghewint
 
Daer men hare wesen al met versint
55
Die wert ghesoeghet in hare confoert
 
Die hem met minnen in minne dus mint.
 
 
 
Die dus in minnen wilt vervaen
 
Hine sal ontsien noch cost no scade
 
Noch pine hi sal met allen staen
60.
Int alrenauste van minnen rade
 
Ende met hoghen dienste sijn onderdaen
 
In al hare comen in al hare gaen
 
Die dit op minnen trouwe dade
 
Hi soude in minnen al minne volstaen.

Vorige Volgende