Logo DBNL
Werken. Deel 1: Gedichten (1875)

Werken. Deel 1: Gedichten

(1875)– Hadewijch–rechtenstatus Auteursrechtvrij

Vorige Volgende
tekstkritische noten

XII

 
Men mach der nuwer tide
 
Op den nuwen dach
 
Wel hopen in elke side
 
Altoes alst nu wel mach
5
Die minne bekint den menegen slach
 
Dien ic doer hare lide
 
Soe leve ic voert op minnen sach
 
Met droeven herten blide.
 
 
 
Al haddic nuwe iare
10.
Ende nuwen tijt ende groene
 
Nochtan leefdic met vare
 
In al minen tone
 
Met vollen nuwen ongheroene
 
Het en si dat minne mi haer openbare
15
Ende haer selven gheheel gheve in verdoene
 
In allen nuwen clare.
 
Het ware hem nu wel ongherede
 
Die nu woude pleghen trouwe
 
Hem soude ghescien wel lede
20.
Met meneghen nuwen rouwen
 
Soudene de vreemde wrede blouwen
 
In meneghe nuwe veede
 
Eer hi dat lantscap mochte scouwen
 
Daer minne haren vrient doet ghelede.
 
 
25
Ay hoert ghi nuwe, liede
 
Die nu minnen wilt pleghen
 
Ende merket wat ic u diede
 
Ende wacht u wel daer ieghen
 
Diere es vele die scinen ochte si negen
30.
Daer men hem minne riede
 
Ende dolen uter trouwen in vreemden weghen
 
Dit saghic.dat ghesciede.
 
 
 
Selke wanen in minne
 
Hebben groet gheval
35
Hem scijnt in allen sinne
 
Ghebloyt berch ende dal
 
Maer alsmen ter waerheit gripen sal
 
Soe esser lettel inne
 
Ane werken van trouwen proeft men al
40.
Ochte men ane minne iet winne.
 
 
 
Het es te ellendich leven
 
Hier sonder lief dus lanc
 
Dat doet ons dicwile sneven
 
Ende bringhet ons in meneghen wane
45
Waert tijt ic wists der trouwen danc
 
Woude si ons dat wesen gheven
 
Dat ons gheleide in minnen bedwane
 
Ane hare nature een cleven.
 
 
50.
Wi connen ons wel vermeten
 
Du mijn lief ende ic di
 
Behaghen hevet ons beseten
 
Ghenoechte maect ons vri
 
Ende wi moghen ghedueren ay mi
55
Dade ons minne eens weten
 
Dat edele wesen dat si si
 
Wine mochtens ure vergheten.
 
 
 
Nu merket ghi alle vroede
 
Hoe der minnen cracht es groet
 
Si hevet die geweldeghe roede
60.
Over al dat god gheboed
 
Si brachte hem selven toter doet
 
Voer minne en es ghene hoede
 
Werket in minnen trouwe ende wert hare genoet
65
Ende doer smaket haer edele goede.
 
 
 
illustratie Wien minne ye van binnen stoet
 
Hi es van soe fieren moede
 
Wat hi ghedoghet in wederstoet
 
Hets hem ten besten spoede.

Vorige Volgende