Logo DBNL
Werken. Deel 1: Gedichten (1875)

Werken. Deel 1: Gedichten

(1875)– Hadewijch–rechtenstatus Auteursrechtvrij

Vorige Volgende
tekstkritische noten

XI.

 
Nu es die edele tijt geboren
 
Die ons bloemen sal bringhen int lant
 
Soe sijn die edele die sijn vercoren
 
Te draghene dat ioc der minnen bant
5
Hem bloyet altoes de trouwe in hant
 
Ende edele bloeme met diere vrocht
 
Daer wert met trouwen twoert doer socht
 
Daer blivet de minne ghestade
 
Met eenre vreemscap al doerknocht
10.
Int hoechste van minnen rade.
 
 
 
Mijn ioc es soet mine bordene es licht
 
Seghet selve die minnare es der minnen
 
Dit woert hadde hi in minnen ghedicht
 
Daer buten en mach ment niet waer kinnen.
15
Alsoe ic mi can versinnen
 
Soe es hem lichte bordene swaer
 
Ende si doghen meneghen uren den vaer
 
Die buten minnen wonen
 
Want der knechten wet es vaer
20.
Maer minne es wet der sonen.
 
Welc es de bordene licht in minnen
 
Ende dat ioc dat soe suete smaket
 
Dat es dat edele draghen van binnen
 
Daer lieve de minne met gheraect
25
Ende met enen wille soe enech maect
 
Met enen wesene sonder keer
 
Begherten diepheit scept emmermeer
 
Ende dat sceppen drinket al de minne
 
Die scout die minne maent ter minnen
30.
Gheet boven menschen sinnen.
 
 
 
Het en mochte nie herte noch sin gheraden
 
Dien minne met minnen hevet verladen
 
Hoe hi sijn lief met minnen ane staert
 
Want hi ene ure niet en spaert
35
Hine stare met trouwen in minnen fijn
 
Want sine vonnessen moeten al sijn
 
Ghelesen in minnen anscine
 
Ende daer siet hi claer
 
Waer sonder scijn
40.
In meneghe suete pine.
 
 
 
Hi siet in claerheiden dat die mint
 
Met volre waerheit pleghen moet
 
Alse hi met waerheiden dan bekint
 
Dat hi der minnen te lettel doet
45
Verstoermt met pinen sijn hoghen moet
 
Want in minnen anscine neemt hi al
 
Hoe minne der minnen pleghen sal
 
Ende dat vonnesse suet de pine
 
Ende doet hem gheven al om al
50.
Omme der minnen genoech te sine.
 
 
 
Die hem in minnen ghenoegh dus gheven
 
Wat groter wonder sal hem ghescien
 
Si selen met minne ane minne een cleven
 
Ende selen met minne al minne doer sien
55
Ende met haren verhoelnen aderen al tien
 
Int conduut daer minne haer minne al scinket
 
Ende met minnen haer vriende al dronken drinket
 
In wonder voer hare woeden
 
Dit blivet den vreemden al ontwinket
60.
Ende openbaer den vroeden.
 
 
 
God gheve hem allen die minne begheren
 
Dat si der minnen alsoe ghereden
 
Dat si al op hare rike teren
 
Datse minne in haer minne moghe gheleden
65
Soe en mach hen biden vreemden wreden
 
Nemmer mescien sine leven soe vri
 
Alse ic al minnen ende minne al mi
 
Wat mach hem dan meer werren
 
Want in haerre ghenaden staen si
70
Die sonne die mane die sterren.

Vorige Volgende