Beschrijvinghe van alle de Neder-landen

Het Graefschap van Hoochstrate.

⁺ HOochstrate is tot een Graefschap ghemaeckt door Keyser Karel den vijfsten: het is een fraey vlecke, maer sonder mueren oft vesten: gheleghen van Antwerpen ende van Berghen bykants even verre, te weten ses mylen. Van hier is gheboren geweest Anthonis Schore, een seer gheleert ende vermaert man. Ontrent een derdendeel van een myle van Hoochstraten leyt een groot ende seer sterck Casteel, daer de Grave ghemeynlijck ⁺ zijn Hof houdt: gheleghen op het watervlietken de Mercke, welck daer by zynen oorspronck neemt, ende loopende door Breda, voorts onder weghen Sevenbergen, in de Mase valt. Dit Graefschap heeft onder hem veel dorpen, ende soo veel landts dattet eenen fraeyen staet uyt brenght. De Heeren van Hoochstrate zijn gesproten uyt den edelen ⁺ huyse van Lalaing: ende nu teghenwoordichlijck is Grave Heer Anthonis Ridder des Gulden Vlies, een jonck aenkomende vroom man, de welcke onder zyne goeden, rijckdommen ende financien een seer schoone Librerye heeft.

Byv. [Hoochstrate heeft in dese borgherlijcke oorloghen veel gheleden, ende hem moeten vervoeghen met de ghene die de sterckste in het veldt gheweest zijn.]

Ontrent een myle van Hoochstrate staet het groot ende fraey dorp Loenhout, van daer ⁺ Jan Stade gheboren is, een wel geleert man, ende seer groot Mathematijck, ghelijck ghenoech blijckt by zyne wercken, geschreven in de Bibliotheke des gheleerden Coenraedts Gesners, grootelijck vermeerdert door den deuchdelijcken Josias Simler, waer in niet alleenlijck de namen van de oude'ende jonghe Schryvers staen, maer oock in sonderheydt bykants alle heur wercken in alle konste ende wetenschap: welck veel arbeydts heeft gekost, ende is een fraey ende gerieffelijck stuck tot veel dinghen.

+ Hoochstrate verheven tot een Graefschap.

+ Ghelegentheydt van het casteel van Hoochstrate.

+ Van wat huyse de Graven van Hoochstrate.

+ Joannes Stadius van waer gheboren.