Briefwisseling van Hugo Grotius. Deel 11

4929. 1640 november 17. Aan L. Camerarius¹.

Illustrissime domine,

Accepi literas Excellentiae vestrae datas 6 Novembris² et simul illas, quae cognatum³ commendant. Is ipse et quotquot mihi unquam ab Excellentia vestra commendabuntur, invenient me paratissimum ad omnia officia, quae a me proficisci possunt.

De Italicis rebus nihildum certi perspicimus. Sed videntur res ibi ad pacem se vertere. Papae tamen et legato Gallico, qui Romae est⁴, adeo nondum bene convenit, ut mutuae⁵ exerceantur caedes. Is qui Neapolitanum regnum rexit⁶ et nunc praeerit exercitui Hispanico ad Rheni superiora, pro sex millibus, quae sperabat, aegre tria reperiet. Pars enim caesa est, pars diffluxit egestate stipendiorum. Etiam Rhaetis pensiones suae promissae ab Hispano, non persolvuntur. Id plebs aegre fert. Primores dum privata sectantur commoda, publica incommoda dissimulant.

De Catalanis varia est judicatio. Multum quidem provecta sunt inter Catalanos Hispanosque alios odia. Sed metuitur, ne Hispanus ille cardinalis⁷ a rege Hispaniae ad eos missus dissimulando, concedendo, pollicendo ad obsequium eos reducat aut eos discordes atque inter se suspectos faciat.

De Britannicis rebus quid augurandum sit, ex parlamento Anglico discemus.

Ego regem heri conveni et peractis multis gratulationibus oravi, ut vi majore arma in Germaniam vertat, ne a nostris, in quos tantae hostium concursant copiae, damnum aliquod accipiatur insanabile. Rex id se agere dicit. Urget autem, ut certus fiat, quid futurum sit de federe⁸. Tempus esse, ut id norit atque ex eo consilia capiat.

1 Copie Uppsala, UB., cod. 388a, ep. [255]. Copie München, Bay. Staatsbibl., coll. Camer., ad Clm. 10415, f.^o 99b. Gedrukt Epist., p. 655. Verschillen in de orthografie en aperte onjuistheden in de beide copieën zijn niet gesignaleerd.

2 Camerarius' brieven aan Grotius van 1640 ontbreken.

3 Niet geïdentificeerd; vgl. no. 4958.

4 François-Annibal d'Estrées, markies van Coeuvres.

5 De copie Uppsala geeft abusievelijk ‘multae’, de copie München abusievelijk ‘mumae’.

6 Felipe Ramírez de Guzmán, hertog van Medina Las Torres.

7 Niet geïdentificeerd; vgl. no. 4917.

8 Het verdrag tussen Zweden en Frankrijk werd in juni 1641 verlengd; zie Du Mont, Corps Dipl. t. VI. 1, p. 207vv.

[p. 618]

Non caret ratione sollicitudo Excellentiae vestrae, ne Lunaeburgicus et Hassica⁹ a nobis abstrahantur.

Consilium electoris Palatini¹⁰ improbare non possum eundi ad Daniae regem praetentato tamen ejus regis animo, ne iter sine fructu susceptum dedecoris aliquid adferat. Dixi idem D. Paullio¹¹, qui de ea re egit mecum. Is heri etiam cum rege ac ministris regiis ea de re locutus est. Arbitror ipsis non displiciturum quod sibi proposuit elector.

Dicitur Arnimius¹² in Prussia considere. Suedi nostri satis habent negotiorum. Bellum illis apertum est cum domo Austriaca potentissima, cum Saxone¹³, cum Brandenburgico¹⁴ aliisque illarum partium; cum rege Poloniae perpetua belli causa; cum Dano simultas facile in bellum eruptura. Reginae viduae¹⁵ abitus et quae vix unquam absunt ab interregnis, potentium familiarum inter se aemulatus, tum vero alii pacis, alii belli cupidiores, ut malum grande regno non minentur, multum tamen addunt ad curas. D. Thuillerius¹⁶ auctoritatem in hac aula habet. Is apud Venetos cum esset, nihil Batavis in iis, quos poscunt honoribus, gratificari voluit.

Deus Excellentiae vestrae semper faveat.

Excellentiae vestrae perpetua observantia
devinctus
H. Grotius.

9 Georg, hertog van Braunschweig-Lüneburg, en Amalie Elisabeth van Hanau-Münzenberg, landgravin-regentes van Hessen-Kassel.

10 Karl Ludwig van de Palts.

11 Friedrich Pawell von Rammingen, diplomaat in dienst van Karl Ludwig van de Palts.

12 Hans Georg von Arnim-Boytzenburg.

13 Johan Georg I, keurvorst van Saksen.

14 Georg Wilhelm, keurvorst van Brandenburg.

15 Maria Eleonora van Brandenburg, weduwe van Gustav II Adolf.

16 Matthieu (Gaspard) Coignet, sieur de La Thuillerie, graaf van Courson.

Lutetiae, XVII Novembris MDCXL.

Adres: Ludovico Camerario, reginae regnique Sueciae consiliario et legato apud praepot. Ord. Foeder. Belgii.