Briefwisseling van Hugo Grotius. Deel 11

4733. 1640 juli 10. Van C. Barlaeus¹.

Illustri ac magnifico viro D. Hugoni Grotio, regnorum Sueciae apud christianissimum regem legato, C. Barlaeus S.P.D.

Illustrissime vir,

Ut credas meo quoque exemplo verum esse senes bis pueros esse, mitto Epithalamium, quod nuper scripsi² in nuptias Leonorae Bartelottae³, virginum principis. Videbar mihi iuvenescere, cum illa tractarem carmine, quae iuveni olim arrisere. Emeritum militem recreat subinde conspectus armorum, quibus gerendis impar e(st). Et crepundia non illibenter tractat sexagenarius pater. Ego cum voces hasce festivas et geniales loquerer, sensi veteris vestigia flammae⁴. Necdum etenim thalami causae blandique labores exciderant animo⁵. Ignosce, si pro aetate et professione minus gravia dixerim. Exporrigenda interdum frons est philosopho praesertim in nuptiis, a quibus abesse debet quicquid tetricum torvumque.

1 Hs. Amsterdam, UB., Bd. 338. Eigenh. oorspr. Beantw. d. no. 4903.

2 In Nvptias Amplissimi Viri D. Iacobi Pergens, Et laudatissimæ Virginis Leonoræ Bartelottæ in: Casparis Barlæi Antverpiani Poematvm Pars II, Elegiarvm et Miscellaneorvm Carminvm. Amstelodami, Apud Ioannem Blaev. MDCLV, p. 350-356.

3 Leonora Bartolotti (1613-1674) was een dochter van Willem van den Heuvel, later genaamd Guillielmo Bartolotti, stichter van het bankiershuis Bartolotti, en diens tweede vrouw Margaretha Thibaut. Leonora huwde op 22 mei 1640 met Jacob Pergens, heer van Vosbergen, koopman te Amsterdam. Zie Elias, Vroedsch. I, p. 386 vv.

4 Vergilius Aen. IV, 23: adgnosco veteris vestigia flammae.

5 Vergilius Aen. I, 25-26: causae irarum saevique dolores// exciderant animo.

[p. 385]

Uxoris tuae beneficio dentes non semel commodavi primoribus huius reipublicae, qui, dum meritorum tuorum et tot adversis infractae mentis memores benevolentiam suam erga te coniugemque praestantissimam prolixe explicant, etiam me tantorum epulis accumbere divum⁶ voluere. Bibimu(s) Excellentiae tuae nullibi non, apud Hoofdium, Vicofortium, Teulingium, Cloeckium⁷, quos omnes devinctissimos tibi habes et devotos prorsus. Parat ad te reditum uxor, cui literulas has tradidi, ut Excellentiae tuae traderet ea manu, quae tibi in amoris indissociabilis pignus olim data est. Faxit Deus, ut illa incolumem te, tu illam sospes vegetusque videas.

Collega meus clarissimus Vossius⁸ iam valet, postquam cum podagricis doloribus hebdomades aliquot luctatus fuit.

Princeps Auriacus, qui in agro Franconatum aliquandiu cum exercitu haesit, reflexo cursu in Waesiam traiecit et Hulstam obsedit occupatis primo exscensu castellis aliquot, quae urbi hic illic ad tutelam imminebant. Caesa ante tridu(um) Hispanorum millia duo praeter turmas equitum tres, quae ad urbem tendebant. Magna spes erigit nostrates fore, ut urbe potiatur princeps, si perficiendae circumvallationi brevis mora detur.

Vale, vir illustrissime et clarissime, et me ama.

Excellentiae tuae observantissimus
Caspar Barlaeu(s).

6 Vergilius Aen. I, 79 (Aeolus tot Juno): tu das epulis accumbere divum.

7 Pieter Cornelisz. Hooft, Joachim de Wicquefort, Diederick Tholincx en Pieter Cloeck. Op 4 juli 1640 had ten huize van Tholincx een feestelijke ontvangst voor Maria van Reigersberch plaatsgevonden; vgl. Van Tricht (ed.), Briefw. Hooft III, nos. 1026, 1027 en 1029, resp. p. 258, 261 en 263.

8 De Amsterdamse hoogleraar Gerardus Johannes Vossius.

Amstel. X Iul. MDCXL.

Boven aan de brief schreef Grotius: Rec. 28 Oct.

Onder aan de brief staat met andere, recentere, hand: insc[r]iptio erat: Illustri ac magnifico viro D. Hugoni Grotio, regnorum Sueciae apud christianissimum regem legato, Lutetiam.