Briefwisseling van Hugo Grotius. Deel 10

4048. 1639 april 2. Aan A. Oxenstierna².

Excellentissime atque illustrissime domine,

Accepi a D. cardinali³ instrumentum quo ratum facit ex potestate sibi concessa permissum regis⁴ de cannabaceis telis per nostros evehendis; ejus mitto exemplum. Idem cardinalis domum, quam in hac urbe habet splendidissimam, donavit regi etiam scripturis interpositis. Hac liberalitate credidit et se levari parte invidiae et firmiora fieri cetera successoribus suis.

Incipiunt movere se milites, ut praestituta die sint in iis collimitiis ad quae destinantur. Sed res ducis Vinariensis⁵ tardius quam pro occasionum tantarum celeritate procedunt. Nos nihil omittimus, quo impelli haec aula ad promovendum bonum publicum possit. Interim in tanto sumptu bellico non desinit Gallia ostentare divitias data pecunia mandatisque Noyerio⁶, ut quae ad Luparam quadrandam deficiunt, consummet.

Mileraeus⁷, cardinalis propinquus, honorem sibi quaerit reducti in patriam comitis Suessionensis⁸ et de conditionibus cum eo per literas ac nuntios agit.

Rumor his diebus per urbem sparsus fuit Suedos et ducem Vinariensem seorsim moliri indutias, quem ego et fidei apud Suedos sanctimonia et ipso rerum D. Bannerii⁹ cursu refutavi.

Det Deus, excellentissime et illustrissime domine, cuncta felicia regno reginae¹⁰ tuaeque Sublimitati.

Tuae Sublimitatis cultor devotissimus
H. Grotius.

2 Gedrukt Epist., p. 520; Oxenst. Skrifter 2. afd. II, p. 592.

3 Richelieu.

4 Lodewijk XIII van Frankrijk.

5 Bernhard, hertog van Saksen-Weimar.

6 François Sublet, seigneur de Noyers.

7 Charles de La Porte, hertog van La Meilleraye.

8 Louis de Bourbon, graaf van Soissons.

9 De Zweedse veldmaarschalk Johan Gustavsson Banér.

10 Christina van Zweden.

Lutetiae, 2 Aprilis novi Calendarii 1639.

Dicitur hic princeps Thomas¹¹ esse in Italia in oppido Laudensi.

11 Tommaso Francesco van Savoye, prins van Carignano.

[p. 222]

Adres: Axelio Oxenstiernae, Sacrae Reg. Maj. Regnorumque Sueciae Senatori et Cancellario.