Briefwisseling van Hugo Grotius. Deel 9

3869. 1638 november 30. Aan S. Goff¹.

Vir reverende,

Quod summam pietatis tuae in me benevolentiam non pluribus officiis sum prosecutus, de eo venia danda est occupationibus nostris. Gratias vero maximas tibi debeo, quod initae inter nos amicitiae memoriam et animo retineas et literarum commercio testeris. In utroque ne me vincas, operam dabo.

Nihil mihi laetius contingere potuit, quam quod significant literae tuae non ingratum esse illustrissimo ac reverendissimo archiepiscopo Angliae primati², eum, quem pridem eximiis ejus virtutibus devovi, cultum. De differenda editione³ dignum ipsius sapientia consilium est. Poterunt cum tempore et alia adnasci, quae, si non publice utilia, mihi certe sint oblectamento negotiorum aestus distinguenti studiis tranquillioribus.

Scotorum σϰότωμα lucis omnis Auctorem, ut sanet, precor. Ut autem prudens aliquis dixit, plurimum adversus tales morbos conferunt dies et quies.

Regina⁴, regis Galliae⁵ mater, si studium in Hispanos exuit, est quod nos Suedi, quibus non quidem in Hispanos, sed in domum Austriacam, Hispanis per multa vincula innexam, bellum est, gaudeamus. Et vestra aula hoc maxime tempore fortibus consiliis eget. Ideoque in dominae Chevreusiae⁶ abitu nihil factura damni est.

Deus te, vir reverende, et omnes recti verique amantes servet, tueatur, sospitet.

Tuae pietati obligatissimus
H. Grotius.

1 Copie Gem. Bibl. Rotterdam, coll. Rem. Kerk, cat. v. hss. no. 674. Gedr. Epist., p. 483. De Engelse theoloog Stephen Goffe (1606-1681) werd vaak gebruikt voor diplomatieke missies.

2 William Laud.

3 Misschien is hier sprake van Grotius' in 1647 verschenen De imperio svmmarvm potestatvm circa sacra; Ter Meulen-Diermanse, no. 894.

4 Maria de Medici.

5 Lodewijk XIII.

6 Marie de Rohan, hertogin van Chevreuse.

Lutetiae, XXX Novembris MDCXXXVIII.