Briefwisseling van Hugo Grotius. Deel 9

3537. 1638 april 22. Aan Willem de Groot⁸.

Mi frater,

Quod hic temporis fuit Petrus⁹ neque ipsi neque mihi periit. Nam et ipse didicit utilia non pauca et mihi voluptati fuit quae didici ex me nato tradere aut certe, unde disceret, monstrare. Nunc eum tuae tutelae curaeque et disciplinae commendo rogoque, ut quotidianis sermonibus eum forensium vocabulorum morumque notitia excolas, ut aliquando non inter rabulas et leguleios, sed inter oratores jurisque consultos locum suum tutari possit efficiatque, ut imago quaedam mei apud Batavos maneat ipsisque tacens exprobret quod in me admiserunt.

De victoria ducis Vinariensis¹⁰ quae ex nobis didicit, referet ipse.

Optamus omnes tibi, uxori¹¹, liberis¹² et amicis prosperrima.

Tibi obligatissimus frater
G. Grotius.

8 Gedrukt Epist., p. 877. Beantw. d. no. 3559.

9 Pieter de Groot.

10 Bernhard, hertog van Saksen-Weimar.

11 Alida Graswinckel.

12 Voor hun namen zie men no. 3452, p. 83 n. 13.

Lutetiae, 22 Aprilis 1638.

[p. 222]

Id vel maxime rogo, ut quae in filio jeci semina cognitionis ad pietatem ea tu alas eosque amicos ei commendes, quibus par sit studium.