Briefwisseling van Hugo Grotius. Deel 8

2976. 1637 februari 27. Aan P. Schmalz³.

Nobilissime Domine,

Quicquid a nobis tibi gratum proficisci potuit, et exiguum est et tibi tuo jure debitum. Itaque gratias illas, quas tam liberaliter agis, lubens admodum tibi remitto paratus semper amicitiam Tuae Nobilitatis, quam plurimi facio, omnibus officiorum generibus colere alereque.

Quae ad te e Suedia scripta commemoras, congruunt satis cum temporum ratione et responso, quod Avaugurio⁴ datum est. Ego in omni meo sermone, etiam eo, quem ad regem⁵ his diebus habui, ita ostendo fortem nostrorum animum, ut non taceam difficultates, tum quae ex pupillari regno circa tales deliberationes nasci solent, tum quae imminent ex tanto hostilium exercituum in nos concursu, nisi amici et valide et abscissa omni contatione partem hujus procellae avertant.

De ducis Bernhardi⁶ literis puto non male Tuam Nobilitatem constituisse. Nam et alias recentiores in meo fasciculo misit postremo, quo scripsi, die. Haud dubie is princeps multum sua referre existimat, ut Suedi in bello maneant.

Galli ajunt putare se nihil actum iri in Poloniensi conventu ante mensem Majum.

Vale quam optime.

Tuae Nobilitatis studiosissimus
H. Grotius.

3 Hs. Stockholm, RA. Eigenh. oorspr. Gedrukt Ep. ex Mus. Meerm., p. 40; Oxenst. Skrifter 2. afd. IV, p. 582. aant.

4 Charles Du Bois, baron d'Avaugour.

5 Lodewijk XIII van Frankrijk.

6 Bernhard, hertog van Saksen-Weimar.

Lutetiae, 27 Febr. novi Cal. 1637.

Adres (met andere hand): Monsieur Monsieur Smalckius à La Haye.

En verder (eveneens met andere hand): [Praesent.] Hagae die 27 Februarii/9 Martii 1637.