Briefwisseling van Hugo Grotius. Deel 6

2280. 1635 september 20. Aan Christina van Zweden¹.

Cum intelligam factas cum Polonia inducias², ea res ut Sacratissimae Majestati tuae totique Suediae bene vertat Deum precor speroque futurum, ut eo bello liberata gens fortissima liberius vacet sustentandis amicorum rebus. Quae, si unquam, nunc certe et consilii et auxilii indigent. Nec deest sua ex parte rex Galliae³, ipse profectus ad partes Lotharingiae proximas, ut egregio quem ex Galliis undique, et Helvetiis contrahit exercitu ducem Carolum⁴ illis locis expellat, dum sub cardinali Valetta⁵ aliae copiae de transrhenana possessione cum Galassio⁶ certant et in Italia junctis Galliae, Sabaudi⁷, Parmensis⁸, Mantuani⁹ viribus irruptio in agrum Mediolanensem et Valentiae obsidium speratur. Nec quicquam adversus Galliam movere audet classis Hispanica. Argentoratum aliis civitatibus constantiae dat exemplum, aliis fidem mutatam exprobrat. Par virtutis specimen inter principes landgravius¹⁰, est, a quo magni aliquid ad Rhenum exspectamus.

Dirigat haec omnia Deus ad Christiani orbis bonum idemque, Serenissima ac Potentissima Regina, Domina mea Clementissima, Sacratissimae Majestatis Tuae valetudinem ac solium firmet.

Lutetiae, 10/20 Septemb. 1635.

1 Gedrukt Epist., p. 183.

2 Te Stuhmsdorf op 12 september 1635 voor 26 jaar gesloten.

3 Lodewijk XIII.

4 Karel IV, hertog van Lotharingen.

5 Louis de Nogaret d'Epernon de La Valette.

6 Matthias, graaf Gallas, bevelhebber van Ferdinand II.

7 Vittorio Amedeo, hertog van Savoye.

8 Odoardo Farnese, hertog van Parma.

9 Carlo Gonzaga, hertog van Mantua.

10 Wilhelm, landgraaf van Hessen-Kassel.