Briefwisseling van Hugo Grotius. Deel 5

1868. 1633 augustus 11. Aan F.A. de Thou².

Eo amore me amplexus est vir nunquam nisi religiose nominandus, parens tuus³, eo tu ipse, ut domus vestrae, vir nobilissime, bona malaque non debeam a me aliena existimare. Quare intellecto vulnere, quod tibi sororis⁴ optimae mors inflixit, ea fide indolui, qua te quoque meis malis commotum pro certo habeo. Non advocabo ex sacris et philosophorum libris solatia, quae tibi et abs te et ab amicis scio esse in promtu: unum sufficiet, ut te Thuanum esse memineris, a quo nomine jamdudum nihil mediocre exspectat humanum genus. Solebat parens tuus Musarum non alii aeque familiari consortio luctum eludere. Id ut tu quoque facias, ne precari tantum, non et exemplo hortari te videar, en redeo ad desuetas artes.

Dum te per magni vestigia patris euntem

Par tot imaginibus quaerit et ambit honos:

Dum tua regalem prudentia personat aulam,

Inque foro nemo est nobiliore fide:

Restabat sciremus adhuc, quid robore posses

Pectoris, ut laudum te sine nulla foret.

Grande decus, sed quod praestat Fortuna nocendo:

Haec se non patitur fama minoris emi.

Nil aliud poterat virtutem ostendere tantam,

Quam tam cara tibi, tam cito rapta soror⁵.

Vale, vir nobilissime, et nihil posthac doleas.

Hammaburgi, XI Augusti MDCXXXIII.

T.N. addictissimus
H. Grotius.

2 Hs. Parijs, Bibl. Nat., fonds Dupuy 583 f. 21^bis. Eigenh. oorspr. Gedrukt Epist., p. 115; Ep. ad Gallos, p. 324. Voor de schrijver, François Auguste de Thou, zie III, p. 375 n. 8 en IV corrigenda Dl. III, p. 605.

3 De historicus Jacques Auguste de Thou (†1617).

4 Marie Henriette (geb. 1611).

5 Niet in de Poemata (ed. quinta, Amstelodami 1670; Ter Meulen - Diermanse, no. 6).

Adres: A monsieur Monsieur de Thou, Maistre des Requestes.