Briefwisseling van Hugo Grotius. Deel 4

1675. 1631 september 18. Aan Willem de Groot².

Exspectamus hic a vobis, frater, historiam victoriae nostrorum de comite Iohanne Nassavio³, quae mirum quanta hic praedicatur. Expedit rebus eorum, qui nunc hic imperant, res Hispaniae accisas credi, quo pauciores sint, qui se ad fratrem regium⁴ inde auxilia exspectantem conferant, ad quem dicuntur jam aliquot cohortes defecisse. Cardinalis⁵ et vitae suae consulit acri custodia et vim quotidie intendit, nunc et Caleti praefecturam ad se trahens. Haec omnia fieri non possunt nisi maximis sumtibus, nam praefectis veteribus pecunia, ut exeant, danda est.

Mitto ad te indiculum erratorum in Phaenissis⁶.

Duo adjeci, unum perspicuitatis gratia, alterum quo lenius verba fluant. Caetera omnia a typothetis peccata sunt et eorum quaedam talia, quae sensum aut versum corrumpant. Quare censeo leviora quaedam in exemplaribus nondum divenditis calamo corrigenda; de caeteris monitricem pagellam adjiciendam.

Vale cum parentibus, uxore⁷, liberis, amicis. Schickardi⁸ rogo et Cordesii⁹ ne velis esse immemor.

18 Sept. 1631.

Has epistolas ab Arausione quamprimum tradendas ut cures, rogo.

Tui amantissimus frater
H. Grotius.

2 Gedrukt Epist., p. 842.

3 Zie Aitzema, Saken van Staet en Oorlogh I, p. 1131 v.; zie ook Knuttel, Pamfl. n^os. 4146 t/m 4151.

4 Gaston Jean-Baptiste de France, hertog van Orléans.

5 De Richelieu.

6 Het betreft de nieuwe uitgave van 1631; Ter Meulen-Diermanse, n^o. 497. Vgl. ook n^o, 1674 aan Willem dd. 9 september.

7 Alida Graswinckel.

8 Wilhelm Schickard; zie n^o. 1366, p. 10 n. 7.

9 Jean de Cordes; zie n^o. 1575. p. 315 n. 7.