Briefwisseling van Hugo Grotius. Deel 4

[p. 223]

1514. 1630 juni 8. Aan Willem de Groot¹.

Est jam in itinere, mi frater, Bellimontius², qui et testis erit prosperae valetudinis nostrae et animi amicorum memoris, et tabulam afferet, per quam pictum saltem me conspicias. Nam caeterae spes quam incertae, quam tardae sint, vides. Ecclesiasticorum magnae molitiones, magistratuum partim magna caecitas, plerisque nimium frigus, quibus cor sit pauci. Has ad Medium³ literas ut cures, rogo itemque ad Aysemam⁴ per D. van der Mylen⁵. Novi quod nunciemus quicquam est, nisi etiam Confluentem, Sabaudicum oppidum, regis armis cessisse, haud auso se cum copiis contra ferre principe Thoma⁶. Commeatus jam ad regium exercitum procedunt facilius. De pace sermones, sed incerti. Exspectamus, quid de obsidio Casalis futurum sit et de pace inter Anglum et Hispanum interque Imperatorem⁷ et Suecum⁸. Nam de induciis vestris nihil hic metuitur. Nihil malumus quam parentes amicosque omnes intelligere sospites.

Lutetiae 8 Iunii 1630.

Miramur de Salmasii⁹ negotio nihil nos comperire. Comites Hohenloii¹⁰ apud me fuerunt accincti ad suburbanam quandam peregrinationem. Quominus se in Galliam immergant, morbis hic illic grassantibus impediuntur.

Tui amantissimus frater
H Grotius.

1 Gedrukt Epist., p. 830.

2 Aarnoud van Beaumont; zie n^o. 1513, p. 222; vgl. n^o. 1424, p. 100 en n. 3 aldaar.

3 Johannes Wtenbogaert.

4 Lieuwe van Aitzema? Vgl. III n^o. 1289, p. 349 n. 3.

5 Cornelis van der Myle.

6 Tommaso Francesco (1596-1656), jongste zoon van de hertog van Savoye Carl' Emanuele.

7 Ferdinand II.

8 Gustaaf II Adolf.

9 Het betreft de bemoeienissen om Claude de Saumaise te Leiden de plaats van Scaliger te doen innemen; hij werd in 1631 benoemd.

10 Wolfgang Otto (1611-1632) en Ludwig Kraft (1613-1632), zonen van Anna Maria van Solms en Philipp Ernst von Hohenlohe-Langenburg; zie n^o. 1388, p. 41 en n. 2 aldaar.