Briefwisseling van Hugo Grotius. Deel 3

1298. 1628 augustus 13. Aan B. Aubéry du Maurier¹.

Quae de Baugiaco² scribis³, vir amplissime, grata sunt, neque omisi significare Arausionensium principi⁴, quam constanter in ipsum amicitiam et verbis et factis testatam facias. Hoc mihi constat, si Baugiacus hominum non factiosorum, sed patriae amantium consiliis uti volet, non defuturos, qui ipsi in omnibus, tamque ad ipsius dignitatem, quam quae ad nomen Gallicum pertinent, abunde sint satisfacturi. Mylium nostrum⁵ honores brevi recuperaturum spes est annisu principis maxime.

Legati nostri neque ordinarii⁶ neque extraordinarii⁷ quicquam agunt opperientes, ut videtur, eventum Britannicorum consiliorum. Ipsi domum scripserunt postulantes abeundi hinc veniam, quasi nulla spe renovandi foederis. Sed jussi subsistere, sive ut hic aliquid boni, sive ne quid mali isthic agant.

Liberorum tuorum natu maximis⁸ rediisse eum animum, qui bene conceptam sementem literarum ad pulchram messem perferre possit, non minus, quam aequum est, gaudeo. De minoribus⁹ supervacuum est a me consilium exspectare, cum suum jam vir exactissimi judicii Tilenus¹⁰ dederit, cujus et me gnarum fecit. Id tibi praecipue curandum censeo, ut parem Priolao¹¹ successorem invenias, et puto invenies, si quaeras, et justa commoda ostentes. Tali adjutore ipse praecipuus inspector satis scholae habebis domi.

Ego filium meum natu maximum¹² hunc annum patiar exigere Lugduni sub Vossii oculis. Nam Erpenium¹³ pridem, Iacchaeum¹⁴ nuper amisimus; ceteri sibi vivunt, mihi sunt mortui. Proximo vere eum ad me revocabo, ut ego ipsi adjumento, ipse mihi solatio sit.

Ego cum meis omnibus omnia tibi opto quam felicissima, inter quae hoc vel praecipuum est, ut ex filiorum studiis accipias eam quam optas et mereris voluptatem. Tuae matronae¹⁵ uxor mea se commendat.

XIII Augusti XVI^cXXVIII.

1 Gedrukt Epist., p. 80; Ep. ad Gallos, p. 213 aant.. Antw. op n^o. 1288.

2 Nic. de Baugy.

3 Zie n^o. 1288.

4 Frederik Hendrik.

5 Cornelis van der Myle; vgl. n^o. 1294 in fine.

6 Gideon van den Boetzelaer.

7 Fr. van Aerssen en Caspar van Vosbergen.

8 Maximilien en Louis.

9 Zie n^o. 1288, p. 347 n. 1.

10 Daniel Tilenus.

11 Zie n^o. 1288, p. 347 en n. 2. aldaar

12 Cornelis.

13 Thomas Erpenius was in 1624 aan de pest gestorven.

14 Gilbert Iacchaeus was 18 april 1628 overleden.

15 Zie n^o. 1126, p. 102 n. 6.