Briefwisseling van Hugo Grotius. Deel 2

825. 1623 April 7. Aan Willem de Groot⁸.

Pro iis quas tu, Frater charissime, ac Parens ad me scripsistis literas die 26 et 27 Martii gratias ago. Rogo pergatis ea nuntiare quae fiunt et, quid mihi agendum censeatis, consilia perscribere. Dux Croiaeus⁹ est is quem Pater coniicit. Venisse huc arbitror ob negotium pacis Tellinae Vallis, quod in aliquod tempus

8 Gedrukt Epistolae p. 769.

9 Charles Alexandre duc de Croy, marquis d'Havré, buitengewoon gezant van de aartshertogin Isabella.

[p. 286]

quieturum videtur, sequestro Pontifice. Galli, quia exhausto nunc aerario minus sufficere bello videntur, conditione illa, quam Hispanus offert, ad tempus utentur. Pax Regni videtur mansura, Cancellario¹ in eam partem semper prono ob publicas privatasque rationes. Et iam Rex Melitensem galeonem magnam remisit, itemque Nivernensis naves et sub Guisio² classem, quibus Rupella obsidebatur. Manet tamen castellum portui impositum ad terrorem magis quam ad noxam. Sunt qui putant in oppido detectam factionem pro Rege suscitatam. Atque ideo omissum consilium Rupellani itineris. Hospitalii³ de quibus scripseram, quantum intelligo non vindicatione agunt, sed manus iniectione in rem debitoris. Ubi propius quid rescivero, perscribam. Utraci aliud est negotium, quod nunc non audio moveri. Bulbos exspectabimus. Privati tui negotii successum quam optimum opto. Rex est Fontibellaquei, quo et Condaeus venturus creditur. De pecunia ad vos mittenda non dubitatur. Ego pro patria laborare non desino. Et si nostri fedus arctius cum Gallo inire cupiunt, non deero adiutor. Neque enim ob paucorum iniurias publica utilitas deserenda est. Stobaeus⁴ meus circa finem laborat. Vale cum patre, matre, sorore, marito eius, agnatis, affinibus et amicis. Lutetiae 7 Aprilis 1623.

Tui amantissimus Frater
H. Grotius.

1 Nic. Brulart de Sillery.

2 Charles de Gonzagne, duc de Nevers; en Charles de Lorraine, duc de Guise.

3 Zie p. 282 n. 4.

4 Zie p. 15 n. 4; p. 285 n. 7.