Briefwisseling van Hugo Grotius. Deel 1

[p. 613]

570. 1618 April 16. Aan J. Overall¹.

Reverendissimo Domino D. Iohanni Episcopo Coventrensi et Lichfeldensi.

Reverendissime Domine.

In tantis procellis Ecclesiae simul et Reipublicae versanti nullum obtingere potest solatium tuis literis dulcius. Quare pro iis quas per Hoofdium misisti summas habeo gratias. Multumque gaudeo te Episcopali libertate anniti ne per iniuriam damnentur sententiae, quas vetus Ecclesia damnare non sustinuit, plurimi in illa etiam probarunt. Quam modestiam si imitarentur Theologi nostri, minus sudaremus in tuendis dogmatibus, quae nobis tum a Pontificiis tum a Lutheranis acerrime obiectantur. Synodus Nationalis adhuc urgetur ab iis qui certam sibi ex suffragiorum numero spondent Victoriam. Nos praetentari provincialem tutius magisque ex ordine arbitramur; ea si non successerit, de maioribus remediis consultaturi. Sunt qui a Generali Synodo plus quam a Nationali sperant aequitatis. Oro Rev. tuam Dom. ut D. Eliensem² quantum honeste fieri potest urgeat ad legendum librum de Imperio summarum potestatum³; puto, si diligenter legerit, reperturum a me occursum praecipuis difficultatibus. Utut est iudicium eius, avide exspecto, cui quantum ex animi sententia potero, me aptabo. Germani Theologi scriptum scriptique sententiam laudant. Insurrexit nuper in me Ravenspergerus Groningensis Theologus⁴, ferox iuventa, vitio mihi vortens et quasi haeresin impingens quod Christi defendens satisfactionem non asseruerim nullo modo potuisse Deum aliter peccata condonare; item passum esse Christum poenas gehennales, atque id genus alia. Quid dicam? Miseret me saeculi. Vir quidam pius et doctus Ravenspergero respondet⁵. Idem doctissime tractat Pelagianorum, Semi-Pelagianorum et Praedestinatorum historiam⁶. Utrumque librum simulatque prodierint ad R.T.D. transmittam. Deus te interim, Reverendissime Pater, diu Ecclesiae Catholicae servet incolumem. XVI April. CIƆIƆCXVIII ex Cal. novo.

T.R.D. Studiosissimus
H. Grotius.

1 Gedrukt Parr, The life of James Usher p. [7]. Antwoord op n^o. 562.

2 Andrewes.

3 Zie p. 349 n. 4 en p. 608 n. 2.

4 Zie p. 604 n. 4.

5 Vossius; zie p. 612 n. 6.

6 Zie p. 603 n. 6.