Briefwisseling van Hugo Grotius. Deel 1

448. 1616 Febr. 16. Aan B. Aubéry du Maurier³.

Casum Turonensem⁴, Vir Illustris, quem via Bruxellensi attonitus acceperam, propius tuo beneficio cognovi verbis eius, qui rei certissimus est testis, et in se suisque pars periculi. Nunc, quando omnia satis commode evenerunt, restat, ut Deo immortali agantur gratiae, qui singularem suam providentiam pro regno vestro excubantem vix potuit manifestiore documento exprimere, quam cum ruinam et Reginae Matri et his, qui in Gallia prudentiae, fidei, virtutisque famam ante alios sustinent, innoxiam praestitit. Iussit me tantae rei admiratio ad desuetum artificium redire. Mitto igitur versus⁵, sed quos, tanquam occupati hominis, cum venia legas.

3 Gedrukt Epistolae p. 32.

4 De vloer van een vertrek te Tours, waar Maria de Medici en verscheiden leden van het hof verwijlden, was ingezakt (29 Januari). Zie Pardoe, Life of Marie de Medicis II p. 323.

5 Gedrukt ook Poemata p. 259.

[p. 498]

 

Magni magna parens Regis, qua sospite nostris

 

Non surdum votis credimus esse Deum,

 

Quod te stante domus traxit pars alta ruinam,

 

Hoc etiam coeli non leve munus habes.

 

Nam quae cura fores superis, ostendere mundo

 

Imperturbati non potuere lares.

 

Quin aliis quoque te propter Fortuna pepercit,

 

Quos trabs praecipites, sed sine morte, dedit.

 

Exarmat tua sic omnes praesentia casus;

 

Agnoscit fatum Gallia nostra suum.

 

Quod stetit illius, per te stetit: hoc quoque regni

 

Quod cadit, illaesum te relevante manet.

Vale Vir maxime, et nos perge quaeso in tuorum habere numero, Rotterodami. 16 Februarii 1616.