Briefwisseling van Hugo Grotius. Deel 1

387. 1614 Dec. 21. Aan G.J. Vossius².

Vir Clarissime.

Scribere hactenus ad te distuli, ideo quod de eo negotio³, quod mihi vehementer - ut scis - cordi est, nihil certius indicare tibi poteram, quam nuper cum te viderem in transitu ex me intellexeras. Nunc res quasi confecta est extra minuta quaedam quae facile transigentur: promiseruntque se Curatores propediem eius rei causa extra ordinem conventuros. Distentus hisce Comitiis aliisque rebus urbanis et privatis, de Satisfactione⁴ nihildum chartis consignare potui. Sed quoties meo mihi esse licet, meditationes satis belle procedunt, et opusculum mihi spondent, cuius nec auctorem poenitere debeat, nec taedere lectorem. Tua quae subministrasti, egregium nobis usum praebebunt. Si quid aliud occurrit ab hoc argumento non alienum, rogo annotes. Redit ad te charta, qua Decretum Ordinum quidam Theologi oppugnandum censuerunt: sed accessit pastoris cuiusdam scriptum, qui eius Decreti defensionem suscepit⁵, de quo iudicium tuum expecto. Vale Vir doctissime, et nostri memor vive. 21 Decembris 1614. Rotterodami.

Tibi addictissimus
H. Grotius.

2 Gedrukt Epistolae p. 16.

3 Zie p. 345 n. 5.

4 Zie p. 367 n. 1.

5 Het blijkt niet of de hier bedoelde geschriften voor en tegen het Decretum pro pace (p. 293 n. 2) gedrukt, dan wel enkel in handschrift waren. Onder de pamfletten bij Knuttel is er slechts éen van 1614 (n^o. 2114), n.l. ‘Sommighe Buerpraetgens’ van Robbert Robberts le Canu, die echter geen predikant was. In het jaar 1615 zijn er verscheidene (n^o. 2191 vv.).