Briefwisseling van Hugo Grotius. Deel 1

25. 1601 Nov. 1. Aan J. Lipsius¹.

I. Lipsio literarum principi H. Grotius salutem.

Mitto tibi, Lipsi praeclarissime, Tragoediam Sacram². Inclamabis scio Periculosae plenum opus aleae³. Fateor: Aliter haec sacra non constant. Scripturum praevidere necesse est, nauseantes nonnullos, damnantes alios, convitiis proscindentes, quicquid legunt, plurimos. Ego certe nisi ista omnia ante scripturae exordium praemeditando anticipassem, tam fallerer, quam qui maxime. Et tamen, ecce, profiteor palam, nihil dedisse alterutri partium. Toto Orbi Christiano haec vigilata sunt; nec haec tantum: sed quidquid a me unquam eiusmodi, et quantulumcunque proficiscetur prima erit cautio, ne quid sit non ϰαϑολιϰὸν ϰαὶ οἰϰουμενιϰὸν ut antiqui Patres loquebantur. Tu iudicabis quantum libet, et licet. Tanti enim esse non dubium. Nam abs quicunque scripta, et quovis modo sacra sunt, et seria. De Tragoedia quoque ipsa sententiam tuam exspecto. Est enim haec tua iam ab antiquo provincia Theatris, pulpitisque legem dicere, et nigrum vitiis praefigere Theta⁴. Hoc olim Criticorum fuit. Nunc quo non nomen transfertur, nostro potissimum adulescentum vitio, qui calentes iuventa procul avectas volatu alites consequi temere conamur. Graece melius dicerem, πτερυγίζομεν. Vale vir maxime. Cal. Nov. Anni CIƆIƆCI.

1 Hs. U.B. Leiden, cod. Lips. 4. Gedrukt Burman, Sylloge II p. 63. Beantw. door n^o. 28.

2 Zie p. 16 n. 6.

3 Horatius, Od. II, I, 6.

4 Θ, het teeken van veroordeeling in de Attische rechtbank; vandaar het critische teeken van afkeuring. Cf. Persius, Sat. IV, 13.

Adres: Clarissimo Amplissimoque viro D. Iusto Lipsio Lovanium.