Archives ou correspondance inédite de la maison d'Orange-Nassau (première série). Tome VI 1577-1579

[p. 5]

Lettre DCCIV.
⁺M. de la Personne au Prince d'Orange. Demande de secours en vaisseaux pour les Réformés de France.

*_** ‘Condaeus Rupellam reversus cum opidanis agit....., tandemque tenuit ut classis instrueretur: et quia propriae vires in eam rem haut satis essent, missus Franciscus Persona cum aliis urbis delegatis in Bataviam ad Arausionensem et Belgii Ordines communeis amicos, qui majora navigia, quibus illi abundant, cum rebus ad bellum necessariis commodari peterent, sera tam vicino hoste auxilia:’ Thuan. Hist. 1. 64. p. 202^b.

Monseigneur! Estant en ce païs, par le commandement du Roy de Navarre et Monseigneur le Prince de Condé et Maréchal Danville, pour chercher tous les remeddes qu'il sera possible aux affaires de la France, j'ay esté très-aise d'entendre icy de tant d'endroictz comme, par le voulloir de Dieu, une paix vous est arrivée, laquelle je supplie de bon cueur voulloir bénir et rendre plus ferme et heureuse que celle de France. Beaucoup de gens de bien se tiennent pour asseurez que, sur l'exemple de nostre France, v. Exc. n'aura failly d'y avoir pourveu, autant qu'il luy a esté possible. Nous n'avons aussy moindre resjouyssance, en ce que le repos de v. Exc. nous peult apporter beaucoup de faveur et soullaigement, d'aultant que nous espérons en icelluy conseil et assistance de tout le pouvoir de vostre d^te Exc. pour establir noz affaires mieulx que par le passé; ainsi que par vostre prudence avez bien sçeu faire en vostre patrie, si voz compatriotes ne veullent estre eux-mesmes autheurs de leur mal; et d'aultant, Monseigneur, que nous ne doubtons poinct

+ 1577. Mars.

[p. 6]

⁺que les couronnelz que le Roy avoit réservez à Don Joan d'Austria, ne fauldront à retourner en France, je vous supplye aussy très-humblement, au nom de mes dits Seigneurs Roy de Navarre, Prince de Condé et Maréschal Danville, et toutes les Eglises, qu'il plaise à v.E. de voulloir moienner que les forces qui sont en vostre service et des Estatz, soient disposées à nous secourir, si tant est qu'ilz n'en ayent plus que faire, et à ceste fin vous emploier à ce qu'elles ne soient licenciées que le plus tard que faire se pourra, attendant des nouvelles de mes dits Seigneurs Roy de Navarre, Prince de Condé, et Maréchal Danville, ausquelz j'en ay escript, et, si ma requeste ne peult en tout, que du moings il plaise à v.E. que les gens de pied François, Escoçoys et Wallons, desquelz les Estatz et vous serez contrainctz de vous déscharger, soient disposées à se retirer à la Rochelle, Brouaige et Marance¹, et aultres lieux de Sanctonge et Guyenne, pour ayder au Roy de Navarre et Monseigneur le Prince; et, s'il plaisoit à v. Exc. les y envoyer en les aydant à s'accommoder de vaisseaux pour cest effect, et mesmes de ceulx qui aujourd'huy ne vous peuvent plus servir qu'à les laisser pourrir à rien faire, et avec lesquelz plusieurs des cappitaines seront bien ayses d'aller faire la guerre soubz l'authorité du dit Seigneur Roy de Navarre, et en vous déschargeant de chose qui d'icy en avant vous seront inutilles, v. Exc. s'acquerra une obligation perpétuelle en chose qui ne laisse pourtant à ayder à acommoder les vostres, en tant qu'il nous semble que [courons] tous ung mesme chemyn de la religion, estans au nombre des proscriptz du pape, qui se sçait servir de

+ 1577. Mars.

1 Marans.

[p. 7]

⁺la puissance de nos roys à l'extirpation de leurs propres subjects, et estant asseuré que v.E. a encores mémoire de la bonne affection que noz princes et nostre cause luy ont tousjours monstré, et lesquelz ne fauldront à luy en rendre le remercyement qu'ung si bon office mérite; et finissant la présente, je suppliray très humblement nostre bon Dieu, Monseigneur, qu'il vous maintienne en trèsbonne sancté, très-heureuse et très-longue vie. Heidelberg, ce 7^me mars 1577.

Vostre très humble et très-obéissant cervyteur,

De la Personne.

A Monseigneur le Prince d'Orange.

+ 1577. Mars.