Archives ou correspondance inédite de la maison d'Orange-Nassau (première série). Tome VI 1577-1579

Lettre DCCIII.
Le Prince d'Orange au Comte Jean de Nassau. Il desire sa venue.

Monsieur mon frère, ceste servirat seullement pour

[p. 4]

⁺vous advertir comme j'ay receu vostre lettre, par laquelle me mandés entre aultres choses comme vous estes d'intention vous trouver le viij de ce mois à Colloigne et que attendrés là pour avoir de mes nouvelles, et entendre si je désire que vinsiés ung jour en ce pays, suivant ce que vous avois prié par mes dernières; surquoy ne vous peus celler le plaisir que me seroit qu'il vous pleusse prendre la paine et faire ung tour jusques en Holande; car, oultre le contentement que je aurei de vous veoir, il se présentent plusieurs affaires de grande importance que je désirerois de les vous communiquer et avoir vostre bon advis. Parquoy vous prie très-affectueusement voloir prendre la paine et me venir veoir, et que je seray tousjours prest à le deservir et le mester avecque tant des obligations que vous suis redevable. Or, sur espérance que me ferés ce plaissir, et que aurey bientost ce bien de vostre présence, ne vous feray ceste plus long, remestant le tout à nostre entreveu, qui je prie à Dieu puisse ester en bonne santé. Le chemin que porrés tenir me samble le melieur de vous embarquer à Colloigne, ou bien à Wesel ou à Emmerich, et venir tout droit par la rivière à Dordrecht, et sont les chemins astheur, Dieu mercy, asses asseurés, mesmes par la rivière.... De Middelbourg, ce 3 de mars A^o 1577.

Vostre bien bon frère à vous faire service,

Guillaume de Nassau.

A Monsieur le Comte Jéhan de Nassau Catzenelnbogen.

+ 1577. Mars.