Archives ou correspondance inédite de la maison d'Orange-Nassau (première série). Tome V 1574-1577

† Lettre DCLXXXIV.
Le Prince d'Orange au Comte de Bossu. Lenteur et irresolution des Etats-Généraux.

Monsieur! Depuis ma dernière du 13^e jour de ce mois, j'ay receu encoir deux aultres vostres, ayant veu par icelles les particularitez de delà, et en quel estat les affaires se passent, bien marri d'entendre que c'est avecq la longueur et irrésolution accoustumée, d'aultant que de ceste façon de procéder, comme tout homme de sain jugement coignoistra facillement, ne peult tirer après soy que évidente ruyne de tous affaires et du pays. Et toutesfois estant présentement Mons^r de Havrech et les aultres Députez retournez de Luxembourg, je veulx espérer qu'on aura maintenant prins telle résolution comme pour le bien du pays sera trouvé convenir, et mesmes comme l'on me dict que la sortie des Espaignolz sera conclue et arrestée, ce que toutesfois je ne puis encoir bonnement croyre, ne me pouvant persuader, selon les apparences que je voys, que l'Espaignol vouldra ainsi quicter les Pays-Bas; ce néantmoings il ne peut faillir que de brieff ne voyons à quoy le tout vouldra terminer, et ce pendant je ne puis délaisser de vous prier que tenez soingneuse

[p. 571]

⁺main, afin qu'il soit prins bon regard sur la ville de Namur, car vous considérez facillement combien la ditte ville, ores qu'elle n'ayt aucune forteresse, tant pour sa situation que pour estre frontière, nous importe, et le mal et l'estonnement que la perte d'icelle nous causeroit, qui me faict aultres fois vous prier de tenir la bonne main à ce que sur tout soit prins le regard qu'il convient, et de faire au reste estat de moy, comme de celluy quiest et sera tousjours bien prest à s'employer pour vostre service, comme ung des mellieurs amys que vous pourriez avoir..... A Middelburch, ce 18^e jour de décembre 1576.

A Monsieur le Conte de Boussu.

+ 1576. Décembre.