Archives ou correspondance inédite de la maison d'Orange-Nassau (première série). Tome V 1574-1577

* Lettre DXCII.
Le Prince d'Orange au Comte Jean de Nassau. Affaires de Zélande.

Monsieur mon frère. Ma dernière a esté du 4^me jour du mois passé, et lors vous ay bien amplement escript tout l'estat de ces pays. J'espère qu'aurez receu mes lettres, d'aultant que je suis adverty que le messaigier a passé sans dangier. Je n'ay depuis eu aucunes de voz nouvelles, aussy je ne vous ay rien escript, pour n'estre escheu chose par deçà qui méritoit vous envoyer homme exprès. Nous sommes continuellement travaillans pour ravictuailler la ville de Zierixzee, à quoy tous ceux qui s'y doibvent employer se démonstrent fort bien délibérez. S'il plaist au Seigneur Dieu bénir en cest endroict nos actions,

[p. 359]

⁺et aussi donner Sa gràce que la paix de France (dont il y a icy ung bruyct fort constant) soit conclue et arrestée, nous espérons fermement que cela abaissera non seullement l'orgueil de noz ennemis, ains délivrera aussy ce pays et les circumvoysins de leur tyrannie. Je me suis depuis cincq ou six jours transporté en ce pays de Zeelande, pour tant plus advancher le susdit ravictuaillement. Ceulx de la ville sont encoires fort bien animez.Nous avons journellement de leurs nouvelles, et eulx aussi des nostres, tellement que l'ennemy ne nous a jusques icy peu oster les correspondences, quoiqu'il y travaille bien, que ce n'est sans dangier pour ceulx qui passent et repassent. Je ne fauldray à toutes occasions vous advertir du succès, et singulièrement eschéant chose d'importance. Ce pendant je seray aussi avecq bonne dévotion attendant de vos nouvelles, et responce à mes dyts précédentes; et mesmes si la journée Impérialle va avant; ce que vous avez du royaulme de Poloingne; si l'Empereur prétend encoires à la Couronne d'icelluy, et si on faict encoires quelques levées en Allemaigne et pour qui. ... Escript à Middelburch, ce 16^me jour de may 1576.

Vostre¹ bien bon frère à vous faire service,

Guillaume de Nassau.

A Monsieur le Conte Jéhan de Nassau Catzenellenbogen, mon bien bon frère.

à Dillenborch.

+ 1576. Mai.

1 Vostre - service. Autographe.