Archives ou correspondance inédite de la maison d'Orange-Nassau (première série). Tome V 1574-1577

Lettre DXXXVIII.
N. Brunynck au Comte Jean de Nassau. Nouvelles diverses.

.....Le jour d'hier je receuz ung pacquet de lettres⁽¹⁾ de son Exc. escriptes à Middelburch le xij^e jour de ce mois, responsives à quelques miennes que précédentement je luy avois escript, et mesmes en partie par charge de v.S. Et d'aultant que par la fin d'une lettre son Exc. me commande d'envoyer le double d'icelle à v.S., avecq celles que son Exc. vous escript, je les ay bien en diligence voulu dépescher à v.S., joinctement ceste, afin que soyez sur tout esclarcy de l'intention de son Exc. et puissiez veoir combien son Exc. a ce faict de Embden à coeur. J'en escrips de rechieff à Monsieur de Breyl, afin qu'il se

(1) Lettres. La Lettre 533.

[p. 130]

⁺déclare s'il vouldra faire le voiayge, ou point, et cela bien tost, pour y pouvoir remédier par aultre voye s'yl n'y vouldroyt entendre. Je luy faiz donner trois cens florins Carolus, par dessus les trois cens qu'il a desjà receuz, qui font ensamble six cens, ce qui est à suffire pour faire ung tel voiayge. J'envoye à v.S. aussi le double de la commission en forme de lettre, que le Docteur Léoninus, appellé Longolius, a eu pour aller vers son Exc., suyvant que verrez par ce que son Exc. m'escript. Monsieur le Conte de Schwartzbourg arriva dimanche dernier à Dordrecht, où sa S. fust receue fort honorablement. Son Exc. n'y est pas encoires arrivé, d'aultant qu'il ne peult sortir de Zeelande à cause des glaces... Monsieur de S. Aldegonde est aussy en Allemaigne, et tiens qu'il sera présentement à Heydelberch, et de là passera vers v.S...... Wésel, 28 janvier 1575.

De vostre Seigneurie bien humble et bien obéyssant serviteur,

Nicolas Brunynck.

+ 1575. Janvier.