Archives ou correspondance inédite de la maison d'Orange-Nassau (première série). Tome IV 1572-1574

[p. 239]

* Lettre CDL.
Le Prince d'Orange au Seigneur de Lumbres. Prise du Seigneur de St. Aldegonde.

⁺Monsieur de Lumbres. Depuis mes dernières n'y est survenu chose qu'importe d'en faire mention aultre que depuis quelque jours en çà les ennemis ne sachant que en oultre entreprendre, se sont avec quelques enseignes de gens de pied et quelques cornettes de cheval entrez plus avant icy dans pays, tenant leur principal siège à la Haye, en intention, comme présumons, de fourager et gaster le plat pays. Et espérant faire garder le Maeslant-Sluis, j'avois envoié Monsieur de Sainct-Aldegonde pour la fortifier, mais avant que les ouvraiges ont esté en deffence, l'ennemy, conduit par les paysans d'un autre chemin qu'on les attendoit, l'ont enfoncé, où, à mon très grand regret, le dit S^r de S^t Aldegonde, qui aultrement se monstroit vaillant, mais ayant esté délaissé de ses soldatz, a esté prins avec autres, et mené à la Haye. Néantmoins j'espère, si plait à Dieu, le retirer, soit par eschange d'aucuns de ceulx qu'avons prisonnier, ou bien par ranchon que autrement, selon que je trouveray convenir.

D'autre part, en tant que les chemins sont mal asseurez et que par fois les lettres sont interceptés, dont nous pourroit venir et à la cause grandz inconvéniens, je suis marry que par là m'est osté le moyen de tenir avec vous correspondence des affaires si souvent que je vouldrois bien. Et affin toutesfois que pour cela les choses ne

+ 1573. Novembre.

[p. 240]

⁺soient arriérées, et vous estant si près de Messieurs mes frères, ausquelz je me suis du tout remis, vous prie de traicter toutes choses avec eulx si librement et franchement que vous feriez avecq moy. Et cependant, quant vous trouverez quelque opportunité seure, j'entendray toujours voluntiers de voz nouvelles, joinctement de la disposition des affaires. Je vous ay ces jours passez fait escripre par Bruyninck que la levée qu'on dit se faire par delà par Glissenberger, ce fait à mon descheu¹ et sans aucune charge mienne, ce que je vous ay bien voulu rafreschir affin qu'en puissiez désabuser ung chacun. Et n'aiant [à] vous escripre autre chose, prieray Dieu vous, Monsieur de Lumbres, maintenir à toujours en Sa saincte protection et sauvegarde. Delft, ce xiii de novembre 1573.

Vostre bien bon amy à vous faire plaisir,

Guillaume de Nassau.

A Monsieur, Monsieur de Lumbres, mon bien bon amy, à Couloingne.

+ 1573. Novembre.

1 insu.