De droeve, ende blyde wereldt

Behelsende vele treurighe gheschiedenissen, belacchelycke kluchten, heerlycke leeringen, ende andere ongemeene aerdigheden

[p. 265]

Eenighe raedtselen, wiens uyt-legginghe het selve ghetal achtervolghende aen-wyst.

I.

K En ben 't niet sprack een jonck Gesel,
'k En wilde oock niet dat ick het waer,
Nochtans soo hoop ick evenwel,
Dat ick het worden sal hier naer.

II.

DEn grootsten Predicant die heefter twee ghebonden,
Twee echtelijck getrouwt, en beyde sonder sonden,
Daer was noyt rycker paer, noch slechter Feest bestemt,
De Bruydt was moedernackt, den Bruygom sonder hemt.

[p. 266]

III.

DAt niet en deught wordt wegh ghesmeten,
Waer voor is't goedt, dat wild' ick weten.

IV.

ICk ben onnoosel ende vry,
Van swarte konst oft Toovery,
Van moort oft dieft oft and're schanden,
Waer toe dan sulcken wreeden straf?
Te moeten in een steenen Graf,
Tot polver oft tot asch verbranden.

V.

ICk leef van water wint en steen,
Daer mede moet ick sijn te vreen,
Men noemt my t'onrecht somtyts dief,
En ben noch alle mans gherief.

[p. 267]

VI.

MYn Vader was noch Boer noch Mayer,
Maer ben gecomen van een drayer,
Dus dray ick oock voor arm en ryck,
Maer ben den Esel schier ghelyck,
Want sal ick kloeck aen 't draeyen blyven,
Soo moetmen my met slaghen dryven.

VII.

'T En deed' een haeckxken met een steel
Den Esel soude wesen eel,
En waer dat maer uyt hem ghetrocken,
Soo waer hy eel spyt alle Bocken.

VIII.

DAer is een heerlyck werck gebouwt,
Waer H: de G: het waer van gout,
'tIs soo deurluchtigh in ons ooghen,
Dat kleyn en groot sich spieg'len mogen,
Vaeck wordt hier Hamans spel ghespeelt,
En recht naer't leven af ghebeelt.

[p. 268]

IX.

EEn sack was vol en wordt geleeght,
Nu vintmen dat hy swaerder weeght,
Als sijnde boorde vol ghelaen,
Hoe kan dat sijn? ghy meughtet raen.

X.

VAn ryckdom wort ick meest geboren,
Door my gaet menigh mensch verloren,
En vallen van het hoogh om leegh,
En oft ick schoon niet swaer en weegh,
En schyn heel licht in ieders ooghen,
Noch moet hy sijn van groot vermoghen,
En wel te recht een starcke man,
Die my ghevoeghlyck draghen can?

XI.

ICk heb veel geldts en goedt, en ben ghesondt van lyf,
Nu raedt eens wat het doet dat ick dus arme blyf.

[p. 269]

XII.

IOnck en dom en teer en swack,
Droegh ick licht een heel swaer pack,
Maer out en starck en wel bedacht,
Viel my te lastigh sulcken vracht.

XIII.

DAer is een Man in onse lande,
Heel wel geleert goedt van verstande,
Cloeck in alle sijn bedryven,
Hy can Niet lesen, oock Niet schryven,
Hy can Niet spreken, en Niet hooren,
En u tot een goet ampt ghekooren,
Hy can Niet sien daer't licht en claer is,
En dese Man is Secretaris.

XIV.

Ick wordt gebonden en gheslaghen,
'kMoet sonder misdaet dit verdraghen,
Wat baetet dat ick maeck gheluyt,

[p. 270]

 

Daer moet en brandt-merck op myn huyt,

 

Des spiegelt u ghy diefsche knapen,

 

Die meer als ick verdient Stadts wapen.