Chroniicke vande Hertoghen van Brabant

[fol. 69v]

ANTONIVS BVRVNDVS, XXXV. BRAB. PRINCEPS.

[fol. 70r]

Anthonis den XXXIII.
Hertoch van Brabant.

⁺ANthonis den xxxiij. Hertoch van Brabant, sone Philips Hertochs van Bourgoengien, is in deser manieren aent Hertochdom gecomen.

Joanna dochter Jans die derde van dien name, Hertoginne van Brabant, ende huysvrouwe des bouen-voornoemden Wencelijns, heeft een suster gehadt genoemt Margriete, dese getrout hebbende Lodewijck Graue van Vlaenderen, heeft hem een dochter gebaert, oock met name Margriete. Nae dat dese eens hadde gehout gheweest, wert daer nae een houwelijck gegeuen, aen Philips de Coene Hertoge van Bourgoengien, ende sone Jans die goede, Coninck van Vrancrijck. Dus heeft Philips aen die voorseyde sijn huysvrouwe dry kinderen ghewonnen, te weten, Jan, Anthonis, ende Philips. Jan als d'outste sone succedeerde in sijns vaders Rijck, Anthonis die middelste tusschen dese twee, quam deur de neersticheyt van sijnen vader aen t'Hertochdom van Brabant, hem van sijn oude moeye achterghelaten, die sonder kindt ofte hoir gestorven was.

⁺Desen Anthonis Hertochs Philips van Bourgoegnien sone, is soo wel van sijns moeders, als van sijns vaders wegen, wt Conincklijcken geslachte ghesproten. Hy heeft altijt vanden beghinne sijns Rijcx, seer straffelijck die misdadige gepunieert, maer bysonder die hun ouders oft d'arme verdruckten. t'Landt van Brabant heeft in sijnen tijdt ghefloreert ende voorspoedich gheweest, overmidts de gerechticheyt die in hem was, sonder die welcke geen eendrachticheyt noch vrede onder die menschen en can zijn.

⁺Hy nam ten houwelijck Vrouwe Joanna van S. Paul, een seer edele, schoone, goede ende deuchdelijcke Princersse, aen dese heeft hy twee sonen gewonnen, Jacques en Philips, ende een dochter, die ionck ghestorven is. Int eerste iaer sijns rijcx, heeft hy zijn huysvrouwe Joanna verloren, die hy altijt lief ende weerdt ghehadt hadde, die welck hy tot Vueren dede begraven

Tot deser tijdt waren binnen Parijs ⁺ twee excellente ende geleerde Doctoren inder Godtheyt, Peeter van Aliaco die naederhandt Bischop van Camerijck wert, ende Cardinael, ende Joannes Gerson, Cancellier van d'vniversiteyt. Sy hebben beyde profijtelijcke ende gheleerde boecken beschreuen, diemen noch ter tijdt heeft. In dien tijdt sachmen een Comete, waer deur te kennen gegeven wert, die toecomende doodt des Hertochs van Orliens, met oock den twist van Luydick, welck quaet seer corts daer nae volchde.

Hier nae isser int t'gheheele landt van ⁺ Luyck een groote commotie opghestaen, om dat daer twee Bischoppen ghecoren waren. Die stadt van Maestricht, daer den eenen ghevloden was, wert vande Luyckenaers beleyt, ende d'leste belegh duerde den tijt van sesthien weken. Niet lange daernae is die ghecoren Heer Jan van Beyeren met grooter macht ende hulpe die hem eenighe groote Heeren deden, wt Maestricht ghetrocken tegen die Luyckenaers, ende heeftse met eenen grooten slach verwonnen. Daer werden wel xl. duysent vanden Luyckenaers verslaghen, ende onder dese was ooc doodt gebleven Dierick van Perweys, dien de Luyckeneers, den anderen veriagende, tot dat Bisdom meynden te promoveren. Na dese victorie is den voorsz. Jan van Beyeren inder stadt van Luydick gecomen, punierende alle de ghene, die hen tegen hem gheopponeert hadden.

+ Anthonis den xxxiij. hertoch

+ hertoch Anthonis feyten.

+ hertoch Anthonis houwelijck

+ Twee vermaerde geleerde mannen inder Godtheyt.

+ Beroerte tot Luyck opgheresen.

[fol. 70v]

⁺Daer nae nam Anthonis t'eender huysvrouwen Elizabeth, een wtnemende schoone vrouwe. Men hielt tot Bruessel die feest vande bruyloft in des Hertochs hof, met groote Coninclijcke triumphe. Met zijn huysvrouwe behielt hy t'Hertochdom van Luxemborch. Hy is hierna met grooter macht in Luxemborch gecomen, brengende die rebellighe onder sijn subiectie. Veel sloten ende casteelen heeft hy ter aerden gheuelt, sommighe met gheweldiger hant in-genomen, oock eenige metten viere vernielende. Hy versloech oock eenen grooten hoop vanden genen die t'spel beroct hadden.

Desen Anthonis was een vroom ⁺ ende cloeck Prince om sijn volck tot strijden te verwecken: hy en wilde niet gedoogen dat hem yemant hier inne te bouen ghegaen hadde. Niemants crachten noch knechten ontsiende, was hy altijdt d'eerste inden strijt. Als hy sijn vyanden hadde verwonnen, soo ontfinck hy dese geerne in genade, als sy dat van hem begeerden, ende wat hy te doen hadde daer was hy vlijtich ende neerstich in. Als hy Luxemborch in sijn ghewelt ghebracht hadde, soo is hy ghetrocken na Aken, met thien duysent ruyters. Na dat Sigismundus die Coninck van Roomen daer de croone ontfanghen hadde, naer ouder ghewoonten, soo verbeyde hy sommighe weken des Hertochs Anthonis comste, ende siende dat hy niet en quam (want sijn vrienden ontriedent hem) soo is hy van Aken nae Colen ghereyst. Van desen Prince machmen dit wel voor een memorie houden, dat hy die Latijnsche spraecke soo beminde, als dat hy daghelijcx die Duytschen lasterde om datse dese sprake niet ter herten en namen, maer lieuer die Francoische oft eenige ander tale hadden, dan dese fraye ende lustighe spraecke.

Int iaer ons Heeren 1415. als ⁺ d'Enghelschen om seker oorsaecken teghen die Franchoisen oorloochden, soo hebben sy hunnen leger by Assincourt gheslaghen, ende hebben corts daer nae metten seluen tot Blangy (een dorpken niet verre van Assincourt ghelegen) eenen slach geslagen, van beyde zijden, maer sonderlinghe onder de Franchoisen geschiede daer groote bloetstortinge. Inden seluen strijdt wert Anthonis Hertoch van Brabant met veel andere edele Heeren verslaghen, die den Coninck van Vranckrijck te hulpe gecomen was. Hy die wel eertijts vele onder sijn subiectie gebracht hadde, wert nv selue vande Engelschen om leege gevelt. int iaer 1415. den 25. Octobris, int ix. iaer sijns Hertochdoms van Brabant oft daer ontrent, ende int v. van Luxemborch. Sijn lichaem wert eerst ten eynde van dry daghen onder die verslaghen lichamen gevonden ende wt-ghedragen. Ten eersten vanden Bischop van Dornick eerweerdichlijcken ontfangen zijnde, wert hy daer na binnen Bruessel in S. Goedelen Kercke ghedragen. Alwaer den dienst naer ouder ghewoonten ende costume volbracht zijnde, soo wert t'lichaem met grooter droefheyt der Princen, Edele ende des gantsche lants tot Vueren ghevoert, ende is begrauen geweest by sijn eerste huysvrouwe Joanna van S. Paul, daer hier voren af gheseyt is.

+ Van hertoch Anthonis huysvrouwe ende wat hy daer mede behielt.

+ hertoch Anthonis cracht in d'oorloghe.

+ hertoch Antonis doot.