Chroniicke vande Hertoghen van Brabant

[fol. 55r]

GODEFRIDVS III. IN CVNIS XXVI. BRAB. PRINC.

[fol. 55v]

Godevaert de derde,
Den 25. Hertoch van Brabant, Godeuaert inde wieghe ghenoemt.

⁺GOdeuaert die derde van dien name, sone des voorseyden Godeuaerts die tweede den xxv. Hertoch, Graue ende Marcgraue is mette wiege inden strijt gebracht, want hy verloos sijnen vader noch gheen iaer out wesende. Niet teghenstaende Keyser Coenraert confirmeerde hem al t'gene dat sijn voorvaders hem verleent hadden. Maer om sijnder ionckheyt wille soo waren sommighe Heeren te stouter om te rebelleren, ende besonder H. Wouter, diemen Berthout noemt, des Heeren van Grimbergen sone, ende H. Geeraert van Grimbergen sijn broeder diemen hiet draeckenbaert, beyde H. Arnouts kinderen. Dese wonnen ende destrueerden totten gront toe die Borcht van Netelaer, liggende niet verre van Vilvoorden ⁺ op die Senne, tusschen Vilvoorden (doen ter tijdt een dorp) ende Eppeghem, daermen al noch den berch siet staen. Oock verbrandden sy dat voorseyde dorp van Vilvoorden, beroouende oock iammerlijck t'plat lant.

Allen die Baender-heeren ende den Edeldom van Brabant dit siende ende merckende dese wreede iniurie, daer van sy seer beroert waren gheboden een groote heyr-vaert, vergaderende allen de macht die sy conden, soo in Brabant als Lotrijck ende creghen oock groote hulpe ende assistencie van Graue Diederick van Vlaenderen. Ende trocken alsoo metter macht nae Grimberghen, t'welck sy seer sterck ghebollewerckt vonden, dat sy wonnen ende verbrandent metten Clooster. Des anderen daechs trocken sy voor die stadt van Mechelen, verbrandende t'lant van Grimberghen, ligghende tusschen Deuren ende Mechelen, welcke stadt sy belegerden. Maer als sy vernamen dat die Heeren van Grimberghen een groote macht van volcke hadden vergadert, soo verlieten die Brabanders Mechelen, comende des nachts by Grimberghen logeren, ende t'sanderdaechs trocken sy noch vast naerder, bereet om slach te leueren. Maer wt gratien sonden sy eenen Heraut aenden H. van Grimbergen, hem ontbiedende, dat hy quame tot ghenade vanden iongen Hertoge, ende indien niet, dat hy hem totten strijde soude bereyden, waer op die H. van Grimbergen antwoordde, dat hy met hem wilde slach leueren.

Daer na gaf die H. van Gaesbeke ⁺ den raet datmen haren ionghen Hertoghe van Bruessel soude halen, om de Brabanders moet ende coragie te geuen om vromelijcker te strijden. Ende alsoo wert dit kint liggende in een silueren wieghe, gehaelt van Heer Arnout van Craynhem, ende gehangen aen eenen willigen boom, int velt daer den slach gheschiedde, staende aen een haghe, noch ter tijdt genoemt de Weesen-hage.

Doen wert daer vreesselijck gestreden, vanden morghen tot inder nacht toe. Des anderen daechs werdt daer ⁺ weder bitterlijck ghestreden, tot als die Brabanders die victorie vercregen maer eer dat daertoe quam, so gheschiede daer een grouwelijcke moort ende bloetstortinge, met verlies van menich mans leuen. Als die Hertoghe den Borcht van Grimberghen nu in sijn macht hadde ghecregen, soo wert dese totten gronde toe afgheworpen. Maer hoe wel die voorseyde Hertoghe die victorie hadde, soo en gheschiedet sonder groot verlies niet, want daer veel Princen ende Heeren doot bleuen. Vande Grimberghers was Heer Ar-

+ Godeuaert de iij. inde wieghe genoemt den xxv. hertoch

+ Viluoorden eertijts een Dorp.

+ Goeden en verstandigen raet des H. van Gaesbeke.

+ Grouwelijken striidt van de Brabanders tegen den H. van Grimbergen.

[fol. 56r]

nout H. van Grimbergen alsoo ghewont, dat hy daer af gestorven is, met meer ander edele. Daer wert oock ghevanghen H. Arnout d'oude Heer van Grimbergen, met sijnen sone H. Wouter, ende veel andere.

Desen H. Wouter van sijn ghevanckenisse verlost trock met veel andere Princen ende Heeren over die zee, om die H. stadt van Jerusalem te conquesteren, laetende sijnen iongen broeder te gijsele, in handen des voorseyden Hertochs. Als desen voorseyden Heere Wouter Berthout langen tijdt int ongeloouich lant hadde geweest, ende mannelijc tegen die Saracenen ende heydenen gestreden hadde, soo keerde hy weder herwaert over om sijnen voorseyden ionghen broeder te verlossen, maer bevondt dat hy ghestorven was. Ende ter oorsaecken van desen soo ist, dat die ionckste broeder int landt van Grimbergen, ende in veel plaetsen onder Grimberghen liggende dat leen-goet erft ende behoudt. Heer Wouter vernemende dat hy te langhe vertoeft hadde, soo trock hy haestelijc over die zee, daer hy vanden Saracenen by Damiaten verslagen wert.

Als dien voornoemden Hertoch Godevaert was oudt gheworden xviij. iaeren, soo nam hy tot eender huysvrouwen Margriete des Hertoghen Henricx van Limborchs dochter. Hier deur wert te neder gheleyt den twist ende t'gheschil, dat also lange hadde gestaen, als Godevaert metten baer de Lotrijck weder creech, teghen Henrick van Limborch desen Henrix vader. Desen Godevaert wan aen dese Margriete twee sonen, den eenen genoemt Henrick, die nae sijn vader int Hertochdom succedeerde, ende den anderen met naeme Aelbrecht, die Bischop van Luydick wert, en gemartyrizeert is. Godevaert heeft gheregneert den tijt van xlvj. iaeren, ende is overleden int iaer 1183. Ende wert begraven in S. Peeters Kercke binnen Loven alwaer Margriete sijn huysvrouwe oock begrauen leyt.

Van sommighe teeckenen die in desen tijdt gesien werden.

BInnen den tijdt van desen Hertoch heeft tot veel plaetsen grooten honger ⁺ ende dierte gheweest, ende daer werdt menich wonderlijck teecken gesien. In sommighe steden gheschieden vreeselijcke ende vervaerlijcke eerdtbevingen, inde locht werden dry Sonnen gesien, ende dry Manen.

+ Groote plagen regneren