Godevaert II van dien name.
Den xxiiij. Hertoch van Brabant.
Ga naar margenoot+GOdeuaert de tweede sone des voorseyden Godeuaerts metten baerde, Hertoch ende Marcgraue (inden tijt van Coenraert die Keyser) wt Lutgarde dochter des Hertochs van Salsborch, der Keyserinnen suster, is sijnen Vader int Hertochdom ghesuccedeert. Als dese een iaer gheregneert hadde, soo is hy met grooter menichten van volcke teghen Henrick Hertoch van Limborch gereden, die welcke metter macht in Lotringen gecomen zijnde, bedreef al te grooten gewelt van moorden ende roouen. Godeuaert trock terstont na die stadt van S. Truyen, die hy belegerde, midts dat dese stadt metten voorseyden Henrick was houdende, ende na veel strijdens ende assouten, heeft hy dese ten lesten in-ghenomen met appoinctement, siende dat Henrick hun gheen ontsedt en dede. Die borghers ende inwoonders der seluer stadt, om meerder quaet t'ontvlieden, beloofden hem onderdanicheyt, waer deur sy hunnen peys vercreghen. Daer nae wert die wet versedt, ende die Heeren Henricken gonstich wesende werden verdreuen. Doen quam hy inder stadt, daer hy voor Heere wert ontfanghen ende ghehult.
Van daer trock hy met grooter macht nae Aken, daer hy inghelaten wert, ende heeft den tijt van twee daghen in sijne Maiesteyt gheseten, bedwinghende allen d'inwoonders tot sijnder huldinghe. Aldus die gantsche macht des Hertochs Henricx te niet gedaen hebbende, soo is Godeuaert met sijn knechten in grooter triumphen weder in Brabant gekeert. Niet lange daer na heeft hy oock tegen die Grimbergers oorloge gevoert, maer met meerder schade dan profijt, want die Grimbergers vercregen in desen strijt allen t'gene weder, dat hen Godeuaert metten baerde te voren af ghenomen hadde.
Men leest in sommige chronijcken dattet in desen tijde byder stadt van Louen in eenen nacht honich daude. Daer na is desen Prince Godeuaert ouerleden int iaer ons Heeren 1144. als hy dry iaren ende seker maenden gheregneert hadde, ende wert begrauen in S. Peeters Kercke binnen de stadt van Louen.
Na den tijt vanden voorseyden Godeuaert Ga naar margenoot+ die ij. te weten, int iaer 1161 soo is wt dese werelt gescheyden Ioannes de temporibus, den wapendrager vanden H. Carolus die Groote, Roomsch-Keyser ende Coninck van Vrancrijc, out wesende dry hondert lxi. iaer, t'welck memorabel is.
Auteursrechtvrij