Chroniicke vande Hertoghen van Brabant

[fol. 52v]

GODEFRIDVS BARBATVS XXIV. BRAB. PRINC.

[fol. 53r]

Godevaert metten baerde,
den drij en-twintichsten Hertoch van Brabant.

⁺GOdevaert ghenoemt metten baerde sone Henricx die derde, ende broeder des voorseyden Henricx die vierde, wert Graue van Louen ende Bruessel, ende Marckgrave des H. Rijcx, alsmen schreef 1096. Aen wien Keyser Henrick sijn dochter ghaf tot een huysvrouwe, wesende des ionghen Keysers susters. Dese Godevaert wert metten baerde ghenoempt, midts dat hy sijnen Vader belooft hadde sijnen baert niet eer te scheeren, voor hy en hadde eerst sijn wettelijcke landen Brabandt ende Lotrijck weder vercreghen, waer toe hy quam in deser manieren.

Inden tijdt vanden Keyser Henrick den derden Godevaerts metten baerde schoon-vader, soo trock Hertoch Godevaert van Bullion over die zee, nae dat H. Landt, die Hertoch van Lotrijck was, als af-ghedaelt vande Grauen van Ardennen, van eender zijden, ende liet dat Hertochdom van Lotrijck (daer Brabandt meestendeel in begrepen is) in handen ende bewaringe vanden Hertoge ofte Graue Henrick van Limborch sijn Neue, een dobbel ende onghetrou Prince, sonderlinghe inden twist-tusschen den voorseyden Keyser Henrick, ende Henrick sijn sone, die tegen sijnen Vader op stondt, neerticheyt doende om selue Keyser te zijn, midts dat sijn Vader teghen den Paus ende den stoel van Roomen misdaen hadde, ende was hieromme tot hem treckende veel Princen ende Heeren maer sonderlinghe viel met hem Henrick van Limborch, sterckende den sone ende oproyende tegen sijn Vader. Daernae verliet hy den sone ende trock byden vader. Maer ten lesten sterf d'oude Keyser Henric binnen der stadt van Luijdic, doen hy xlviij. iaren als Keyser hadde gheregneert, lijdende veel ghewelts. Daer-na quam Henrick sijnen sone int Keyserrijck, ende werdt gedachtich der ongetrouwicheyt des voorseyden Henricx van Limborch, ende dede hem vanghen, maer hy ontquamt met practijcken. Ende overmidts dat hy als erfgenaem van Godevaert ende Boudewijn van Buillon dat Hertochdom van Lotrijc daer Brabant meest is in liggende hadde gehouden, so beroofde hem die Keyser daer af, ende ghaf t'selue den voorseyden Godeuaert metten baerde sijnen swaeger, Graue van Louen genoemt, den welcken hy met Keyserlijcke vonnisse maecte Hertoch, alsdoen xv. iaeren Graue van Louen gheweest hebbende.

Die Keyser gaf Godevaert te draghen eenen wapen-schilt van siluer, ende daer na eenen schilt van goude, geclaut, getongt, ende getant van kele, ghelijck wijlen Hertoghe Angijs S. Begghen man voerde. Dit geschiede int iaer ons Heeren 1108. Ende doen wast geleden hondert iaren ende ⁺ een, dat Otto Coninck Charels sone sterf, ende Geerberga sijn suster berooft wert van t'Hertochdom, behoudende alleen Louen ende Bruessel. Maer Godevaert creech weder Lotrijck ende Brabant, vander Maesen totter Schelt, dat sijn voor-vaderen af-ghenomen was, die nochtans van Charels die Groote gheslachte ghecomen waren.

Hertoch Godeuaert nu tot desen state ghecomen zijnde, ontboot de ghene die sijnder voor-vaderen leenmannen plagen te zijn, die welcke als ghehoorsaem ende onderdanich zijnde compareerden. Onder ander ontboot hy Heer Arnout Berthout, Heere van Grimbergen, om sijn leen te comen ontfangen, maer ouermidts sy seer

+ Godeuaert metten Baerde den 23. hertoch

+ Die van Ardennen besaten t'Hertochdom van Brabant t'onrecht.

[fol. 53v]

machtich en rijck was, soo was hy soo grootmoedich, dat hy den Hertoch niet en wilde kennen eenich recht te hebben in t'lant van Grimbergen. Hy was oock Heer van half Mechelen, d'ander helft vercreech hy by coope vande Kercke van Luydick. Hy was oock insghelijcx Heere van Duffel, van Walem, Rumpst, Heyst, Geele.

Desen voorseyden Godevaert metten baerde wert vanden gheheelen Edeldom seer bemint, oock hebben veel Coningen deur hun legaten sijn vrientschap begheert, want het was een goedertieren Prince, verre van alle wreetheydt ende tyrannie verscheyden. Hy socht altijt meer sijnder Heeren, dan sijn eyghen profijt. Hy waecte, op dat sijn ghemeynte soude gerust slapen, hy arbeyde, om dat die sijne souden ledich gaen. Den ondancbaren ende den onverstandigen dede hy deucht, ia oock tegen hun selfs danck.

Vande eerste oorloghen tusschen den Hertoghe ende den Heere van Grimberghen.

⁺ALsoo daer grooten twist was gheresen tusschen den voorseyden Heer Arnout Berthout, ende den Hertoch Godevaert metten baerde, soo vergaderde elck sijn macht, ende die Hertoghe creech veel dorpen ende heerlijcheden met ghewelt van Heer Arnout. Sy leuerden malkanderen slach met grooter menichten van volcke, al-waer grouwelijck ghevochten wert, daer Brabant groote schade was lijdende, want daer werden veel Ridders verslaghen. Heer Arnout een stoutmoedich Prince, sterck ende cloec ter wapenen, oock seer bloetgierich, dreef sijn volck vromelijck aen, sulcx dat hy ten lesten deur groote vromicheyt t'velt behielt, niet teghenstaende dat Godevaert victorieus was, doende oock groote fortse met wapenen onder sijn vyanden, maer moest ten lesten met sijn volck wten velde wijcken. Ende van dier tijt af voerden sy sware ende bloedige oorlogen teghen malkanderen, gheduerende totten sterf-dach toe vanden voorseyden Godevaert. Die xliiij. iaren gheregneert hebbende deur de doot wt dese werelt ghescheyden is int iaer 1140. ende wert begrauen inde Kercke in t'Clooster van Affligem, ende Aleydis Coninginne van Enghelant.

Sijn groote heylicheyt ende godtvruchticheydt ⁺ machmen mercken by allen die Cloosters die hy met sijn eyghen gelt ende op sijnen cost ghefondeert heeft. Hy stichte dat Clooster by Louen Perck genoemt, t'welck daer noch staet, ende nader-hant deur hulpe van veel goede Heeren, met schoon lant ende huysingen vermeerdert ende rijcker gemaeckt wert.

+ Oorloghe tusschen den hertoch van Brabant ende den Heere van Grimbergen.

+ Perck Abdije by Loven gesticht