Chroniicke vande Hertoghen van Brabant

[fol. 50v]

HENRICVS III. XXIII. BRAB. PRINCEPS.

[fol. 51r]

Henrick III. van dien name,
den een-en-twintichsten Hertoch van Brabant.

⁺HEnrick die derde van dien name, heeft gegenereert eenen sone met name Henrick, van desen name die vierde, Graue, ende Marcgraue des H. Rijcx, ende Godevaert metten baerde toegenoemt, den eersten Hertoch van Lotringen, Graue van Loven, ende Marckgraue des Heylich Rijcx. Hy regneerde den tijt van sesthien iaeren, ende sterf int iaer ons Heeren 1090.

+ Henric den iij. den 21. hertoch

d'Oorden der Regulieren.

⁺INden tijdt vanden voorsz. Henrick die derde, te weten int iaer 1080. is d'oorden of t'Clooster-leven der Monicken Regulieren ghenoemt (die daer schijnen hunnen reghel te hebben ontfanghen van S. Augustijn Bischop) ghereformeert, ende tot een beter manier van leuen gebracht, deur den weerdigen man Godts Ino. Ghelijck de selue oorden dry hondert iaren daer nae, weder ontregelt zijnde, in een beter discipline ende manier van Clooster-leven gestelt is, daer byder tijdt inde Nederlanden veel godtvreesende ende gheleerde mannen zijn opghevoedt gheweest, tot groote voorderinge des Catholijcken gheloofs.

+ Costerius Canonicus