Chroniicke vande Hertoghen van Brabant

[fol. 49v]

HENRICVS II. XXII. BRAB. PRINC.

[fol. 50r]

Henrick die tweede
van dien naem, den twintichsten Hertoch van Brabant.

⁺HEnrick die tweede van dien name, heeft verweckt eenen sone oock met name Henrick die derde van dien name, Graue ende Marcgraue des H. Rijcx. Naedemael dat desen Henrick den tijdt van elf iaeren hadde gheregneert, soo wert hy van een Edelman met name Herman in sijn bedde vermoort, alsoo hier boven verhaelt is. inden iaere alsmen schreef 1074.

+ Henrick de tweede den xx. Hertoch.

Een seer groot Reusen lichaem ghevonden.

⁺ONtrent den tijdt des voorseyden Henricx die tweede, soo wert binnen de stadt van Roomen ghevonden een groot Reusen lichaem, gants geheel, sonder corruptie ende onverteert, hebbende in t'midden op de borst een wonde lanck vier voeten ende eenen halven breet, ende dat lichaem was langer dan die mueren vander stadt hooghe waren. Ende men vondt oock in sijn graf staende eenen lanterne met eender bernende keersse, diemen met gheenen winde wt blasen, noch met geenen water wt blusschen en conde, maer daer was eenen van subtijlen verstande, die met een greffie onder in die keersse een ghat maeckte, daer die locht in quam, ende terstont ghinc die keersse wt, ende by lanckheydt des tijdts begonst dat lichaem te verrotten ende stof te worden, als ander menschen lichaemen. Op sijn graf lach eenen steen, opt decksel van sijn lichaem was gheschreven, ende inden steen gegraveert aldus: Hier leyt Pallas Evanders sone, die den Ridder Turnus heeft ghedoot met eender lancien. Men vermoet dat dese woorden doen ter tijdt daer niet opgehouden en waren, hoe wel datmen seyt Carmentis die Latijnsche letteren ghevonden te hebben, maer dat Ennius oft een ander Poeet die nader handt daer op heeft doen setten.

+ Een Reusen lichaem gevonden.