Lambrecht ende Geergerga,
de seuenthienste Hertoghen van Brabant,
Ga naar margenoot+LAmbrecht ende Geerberga, Grauen van Louen ende Bruessel. Dese Geerberga was de dochter van Hertoch Charel, ende die suster, midtsgaders oock erghenaeme vanden Hertoch Otto. Als sy niet alleen onrechtelijck, maer oock ongoddelijck, van haers broeders erffelijcheyt wert wtgesloten soo heeft sy voor haer ghehouden dat Graefschap van Louen ende Bruessel, met ooc d'Marckgraefschap des H. Rijcx, t'welck sy van haren vader tot een houwelijcxsche ghifte hadde ontfanghen. Sy heeft den voorseyden Lambrecht (een stoutmoedich man ter oorlogen) getrout, vanden welcken sy gehadt heeft Henrick ghenoemt d'oude, Graue van Louen ende Bruessel, oock Marcgraue des H. Rijcx.
Desen Lambrecht sone Reyneri metten langen halse, des Grauen van Henegouwe, ende die broeder Reyneri Ga naar margenoot+ Graue desselfs Graefschaps, hem verheffende van die vercregen victorie ouer die Luyckenaers, in eenen bloedighen slach geschiet tot Hougaerden, tegen Baldrick Bischop van Luydic, daer veel edele onder meer andere verslagen werden, soo aerbeyde hy om wederom te crijgen dat hy verloren hadde. Hieromme aenveerde hy een oorloge tegen sijn neve Godefroy, Graue van Ardennen, inde welcke hy by Florivaen verslaghen wert, int iaer 1014. geregneert hebbende den tijdt van xiij. iaeren, ende liet na hem sijnen voorseyden sone Henrick d'oude Graue (daer van wy hier na sullen tracteren) die van sijnder huysvrouwen Geertruyt, dochter Robrechts, de Vriese, Graue van Vlaenderen verweckt heeft eerst Lambrecht den Graue sijnen successeur, een vaillant Prince ter oorlogen, ende Ida die ten houwelijck ghenomen heeft Boudewijn, Graeue van Vlaenderen ende Henegouwe, ende Machtelt die tot eenen man genomen heeft Eustathium, Graue van Bulloin. Lambrecht nu inden strijdt doot-gebleven zijnde, so is Heuric sijnen anderen sone, ghewonnen vander huysvrouwen Oeda, dochter des Graven van Ardennen, in sijn plaetse ghesuccedeert. Ende also dese in eenen strijt gevanghen hadde een edelman genoemt Herman, die welcke binnen Louen int Hof vry ende los ghinck, nochtans als gevangen man, soo is desen op eenen nacht heymelijck inde camer vanden voorseyden Graue slapende, gecomen, ende heeft den seluen deerlijc vermoort, ende die vlucht genomen, int iaer 1078.
Henrick sijnen derden sone is nae sijnen vader gesuccedeert ende in sijn plaetse gecomen. Hy hadde ten houwelijc genomen die suster des Hertochs van Thuringen, aende welcke hy verwect heeft Henrick, die inden strijdt van Doornick doodt gebleven is, int iaer 1069. ende Godefroye, die welcke Lotrijck weder-gecreghen heeft.
Inden tijt des voorseyden Lambrechts ende Geerberga, te weten int iaer 1007. was in Walschlant geboren, een wonderlijc schepsel van een vrou-persoon, met twee hoofden, vier armen, ende voorts allen leden dobbel totten navel toe. Ende beneden den navel voorts, was sy in alder manieren gelijc een ander mensche. By tijden als d'een adt, soo hongerde d'ander, als d'een loech, schreyde d'ander, als d'een sprac dander sweech. Ten lesten so sterf d'een, maer d'ander leefde daer nae ontrent dry iaeren, dragende also des anders doot lichaem, die daer na ooc gestorven is, overmits den grouwelijcken stanck ende swaer verdriet dat sy hadde van dat doode lichaem. Sebastianus Munsterus verhaelt in sijn Cosmographie, van tweelingen, wiens hoofden aen d'een zijde vast aen een gewassen waeren, waer van d'een voor sterf, soo dat d'ander sekeren tijdt noch leefde, tot dattet sterf midts den stanc van het doode lichaem dat was dragende.
Auteursrechtvrij