Henrick I van dien name,
d'oude, den xviij. Hertoch, Graue van Louen ende Bruessel, Marckgraue des H. Rijcx.
Ga naar margenoot+HEnric d'eerste, d'oude, was den xviij. Hertoch, Graue van Louen ende Bruessel, Marcgraue des H. Rijcx, sone Lambrechts voorseyt, die verslagen was deur Godeuaert van Ardennen (als vore) liet eenen sone nae hem, Henrick ghenoemt, die na de doodt van Lambrecht sijnen Vader Graue van Louen ende Bruessele wert geheeten Henrick d'oude. Ende heeft verwect eenen sone genoemt Baldricum, anders Lambrecht toe-genoemt metten baerde, ende Mechtelt die ghetrout heeft Eustachium d'eerste, Hertoch van Bouloin, soo bouen verhaelt is. hy regneerde xxxiij. iaren, ende schreef hem Graue van Louen ende Bruessel. Na dat hy op sijn bedde Ga naar margenoot+ vermoort was, so regneerde Lambrecht die tweede, Henricx sone acht iaren. Dese stichte dat Collegie der Canonicken van S. Goedelen binnen Bruessel, ende S. Peeters tot Louen. Hy wert ten lesten in eenen strijt by Dornick verslaghen, int iaer 1054. ende is binnen Nijuel begrauen gheweest. Henrick die tweede Lambrechts sone, int iaer 1054. heeft gheregneert xxiiij. iaren. Hy hadde getrout die suster des Hertochs van Thuringen, ende heeft twee sonen ghehadt, Henrick ende Godeuaert, hy stierf int iaer 1078.
Henrick die derde Henricx sone, int iaer 1078. heeft gheregeert xvij. iaren. Dese schreef hem Graue van Louen ende Brabant, hy is oock in eenen slach verslaghen by Dornick ende te Nijuel begrauen, int iaer 1095. sonder eenich oyr achter te laten.
Ontrent den tijdt des voorseyden Henricx d'oude, te weten, int iaer alsmen Ga naar margenoot+ schreef 1036. soo heeft een ghenoemt Berengarius, gheboren van Tours in Vrancrijck, begont wt te gheuen tot Angiers ende daer ontrent, d'eerste grouwelijcke ketterije vande Sacramentarisen, waerom verscheyden Concilien werden gehouden, alwaer sijn blasphemige valsche ende nieuwe ketterije ghedoemt wert, die hy oock dickwils int openbaer wederroepen heeft, ende daer niet inne en is ghestoruen. Sijn leeringhe is in dese onsalighe tijden ouer al seer verbreyt.
Auteursrechtvrij