Lotharivs de derde,
Sone Lodewijcx die simpele, den xiiij. Hertoch van Brabant, ende van Lotrijck.
Ga naar margenoot+NAE Lodewijck de Simpele heeft geregneert Lotharis sijnen sone, Coninck van Vranckrijck, Hertoch van Lotrijck ende van Brabant, die welcke Coninc ende Hertoch gheweest heeft den tijdt van xxxi. iaren. Keyser Otto den tweeden sijn ooms sone hadde noch een ander suster genoemt Heylwich die ten houwelijc nam den voorseyden Hugo Graue van Parijs: ende daer van wont hy eenen sone, met name, Ga naar margenoot+ Hugo Capet, desen toenaem wert hem ghegeuen doen hy noch ionck was, ter oorsaken dat hy d'edel kinderen daer hy mede was spelende, gewoon was haren cappruyn af te trecken vanden hoofde. Om dat desen voorseyden Lotharis vredelijc mocht regneren, soo maecte hy den voorseyden Graue Hugo, Vader van Hugo Capet, Maerschalck van geheel Vrancrijck. Maer corts daer na sterf Hugo ende wert tot S. Denijs begrauen. Binnen sijnen tijt wert Hongarijen Ga naar margenoot+ ende Polen totten Christen ghelooue ghebrocht deur den H. man Adelbertum, Bischop van Pragen.
Den voorseyden Lotharis heeft oorloghe ghevoert teghen Keyser Otto den tweeden sijns ooms sone, om t'lant van groot Lotrijck, t'welc sijn voor-vaders hadden beseten, ende is getrocken met een groot heyr in Lotrijck, roouenden ende veel schade doende den Keyser-rijcke. Die Keyser die dit niet en hadde verwacht, liggende alsdoen binnen der stadt van Aken, en dorste hem niet roeren, midts dat hy daer op niet versien en was. Ende als die Coninc Lotharis nu in Vrancrijc weder ghekeert was, soo dachte die Keyser Otto om sijn leet te wreken, waerom hy een groote heyr-cracht vergaderende, ontboot den Coninck van meyninge te wesen hem in Vrancrijc te comen versoecken, ontrent S. Remeus-dage, ende alsoo viel hy met grooter macht in Vrancrijc, ende stichte roof ende brandt al-omme Riemen, Louwen, Soison ende Parijs, ende niemant en dorste hem wederstaen, maer hy en destrueerde die Kercken niet. Ontrent S. Andries dach, liggende op die Seyne, soo wert hem in sijn volc vanden Franchoisen schade gedaen, slaende van achter inden steert. Maer t'is daer na soo verre gebracht, datter een dach-vaert gheordineert wert, om metten anderen te spreken ende te tracteren vanden peyse, ende vergaderden op een riuiere, alwaer dese twee Princen metten anderen een accoort van peys sloten, in deser manieren dat Lotharis Lotrijck vercreech met vasticheydt van eede, nimmermeer eenich recht daer toe te pretenderen, noch te eysschen, t'welck te verstaen is van groot Lotrijck, te weten vanden Rhijn nederwaerts. Ende die Keyser Otto, gaf hem oock ouer die stadt van Dornick, met noch ander plaetsen daer questie om was. Desen voornoemden Lotharis is wt dese werelt ghescheyden int iaer ons Heeren neghen-hondert ende seuenentachentich, ander segghen lxxxiiij. achterlatende Ga naar margenoot+ eenen sone Lodewijck genoemt, die maer een iaer en regneerde nae sijns vaders doot, naer wiens aflijuicheyt succedeerde Charel des voorseyden Lotharis broeder.
Auteursrechtvrij