Chroniicke vande Hertoghen van Brabant

[fol. 26r]

PIPINVS II. HERSTALLVS IV. BRAB. PRINC.

[fol. 26v]

Pvppiin die II.
Van dien naem, met toename van Herstal, oft die Groue, die derde Hertoch.

⁺NA de doot der vooseyder Begga, is haren sone Puppijn int Hertochdom ghesuccedeert, die tweede van dien name, ende die derde Hertoghe van Brabant, ende van Lotrijck, oock wert hy namaels Marck-graue des Heylichs rijcx. Hy was met toename ghenoemt Puppijn van Herstal, ter oorsaecken van een dorp alsoo gheheeten, ligghende tusschen die stadt van Luydick ende Maestricht op die Maese. Alwaer de selue Hertoch een casteel hadde ghebout, daer hy gewoon was hem dickwils te vermaecken, om die soeticheyt des lochts, hem seer aengenaem. Tot Ceulen hadde hy eenen borch Capitolium ghenoemt. Hy heeft seer victorieuselijck geregneert, den tijt van xxix. iaren. Ende was van seer goede ende godt-vreesende ouders gecomen, want d'ander achterlatende, soo was die H. Begga, suster van S. Geertruyt sijn moeder. Hy was een wijs ende vroom Prince, groote neersticheydt doende, tot verheffinghe der heyligher Kercken. Den voorseyden Puppijn, wert Plectrudis een vrouwe van seer H. leuen, tot eender huysvrouwen ghegeuen. Dese twee nu aldus versaemt zijnde, ende wel wetende datter niet voor eendrachticheyt (wesende een wortel van allen goet) en behoort gherekent te worden, hebben t'samen in goeden vrede ende accoorde gheleeft, wt welcke eendrachticheydt ende godtvreesende leuen, dit goet gesproten is, als dat hun Godt die Heere kinderen heeft verleent, die de voetstappen der ouderen in heylicheyt des leuens na-gevolcht hebben, te weten, dry sonen ende een dochter, Drogo, een Prince van Kempen-lant, Grimoaldus, die welcke om die belijdinghe vanden name Godts, ende t'gelooue Christi, binnen der stadt van Luydick namaels is ghemartyriseert geweest, al-waer hy ooc in S. Jacobs Kercke begrauen wert. Die derde sone was Siluius, een seer goedertieren man ende deuoot, die naederhant int ghetal der heyligen ghecomen is. Die dochter wert Noitburgis ghenoemt. Die dat raedt-huys oft voorsz. Capitolum binnen Ceulen heeft laten wijen ter eeren van onser L. Vrouwen. Ende tot een teecken van haer heylich leuen, soo zijn by haer lijck gesien geweest twee hemelsche lichten. Sy rust nv ter tijdt by Coblentz, op S. Beatiberg, int Clooster vande Carthuysers. Haeren feest-dach wort ghecelebreert den 31. Octobris. Maer die voorsz. Puppijn heeft allen sijn kinderen die hy aen Plectrudis gewonnen hadde, ouerleeft.

Die wijle Puppijn met zijn Gouuernement ende affairen in Brabant besich was soo hebben die Vriesen metten Coninck Radbodum, die doen ter tijt noch vyanden des Christen geloofs waren, ende om haer gramschap te beter ouer die Christenen te baren, dat gantsch Francken-landt metten viere ende sweerde ghedestrueert. Puppijn dit vernemende, heeft als een groot beschermer des Christenrijcx wt sijn lant sommige duysenden volcx by een vergadert, met de welcke hy in grooter haesticheydt in Hollant na die stadt Wiltenborch, nv Vtrecht genoemt, getrocken is, ende nademael dese stadt haer langhen tijt vromelijck hadde gedefendeert, soo heeft hy die ten lesten victorieuselijck in-genomen, al waer hy een groote menichte van ongeloouige verslagen heeft, verdrijuende oock den voorseyden Coninck Radbodum, wesende d'eerste die de Vriesen onder gehoorsaemheydt heeft gebracht, die te voren noyt en hadden

+ Puppijn die tweede, de iij. Hertoch.

[fol. 27r]

geleert eenighen wt-lantschen Prince onderdanich zijn. Aldus maeckte hy die Vriesen der Franscher Croonen subiect. Puppijn niet te vreden wesende dese metten sweerde verwonnen te hebben, maer willende oock haer sielen winnen ende salueren, soo heeft hy tot hen gesonden den heyligen man Willeboort, die doen ter tijdt t'woort Godts predickte, op dat hy met het claer licht der Euangelischer leeringen hun verduystert ende ongheloouich herte verlichten soude, ende dat grousaem woest volck, totter kennissen vanden warachtigen Godt mocht bringhen. Hy heeft den Heyligen Lambertum inden Bischopelijcken stoel van Tongheren weder inghestelt, die van sijnen vyanden afgesedt was ende daer Faramondus hem t'onrecht inghesteken hadde. Stephanus Abbas verclaert dat Pipinus veel vermaerde oorlogen vuerende, van allen dese geweldichlijck heeft getriumpheert, ende dat hy heeft selue den Coninck der Francken Theodoricum verwonnen, ende op de vlucht ghedreuen.

Puppijn is nae die doot van sijne voorsz. wettige kinderen, in die schandelijcke ende stinckende sonde van ouerspel ghevallen, t'welck hem tot meerder schanden gerekent wert, om dat hy altijt te voren soo reyn ende onbevleckt geleeft hadde, bevangen met vleeschelijcker liefden van een Edele ende schoon vrouwe Alpiadis genoemt, die hy oock onwettelijck ghetrout heeft, sijn deuchdelijcke vrouwe ende Princersse Plectrudis noch leuende, daer hy eenen sone aen gewonnen heeft, die hy Carel dede noemen, ende namaels Charel Martel geheeten wert, t'welc die H. Lambertus Bischop van Maestricht vernemende, heeft den Hertoch van sijn ouerspel berispt, waerom Dodo die Prince van Oraengien, een groot machtich Heer, broeder der voorseyder Alpiadis, vreesende dat die Bischop den Hertoch soo verre brengen mochte, als dat hy sijn suster verlaten soude, soo heeft hy eenige toegemaect die den H. Lambertum souden ter doot brengen. Dus bevintmen dat hy des nachts langen tijt in sijn gebet gelegen hebbende, seer deyrlijck vermoort wert. Dese moort en bleef aen Dodo vanden rechtueerdighen Godt niet ongheloont, want hy viel in een seer groote ende sware sieckte, diemen die luysuchticheyt noemt, soo dat sijn lichaem van dat gewormte wert gegeten, ende soo grouwelijck was stinckende dat t'selue in een riuiere gheworpen wert. Sijn mede-hulpers en zijn ooc van die wraecke Godts niet vry gheweest.

Nademael dat Puppijn Gouuerneur van Vrancrijck was na die doot des Conincx Hilderijc, die sonder oir achter te laten ouerleden was, van wien hy t'Hertochdom van Brabant te leene was houdende, ende nae sommige vrome feyten in Vrancrijck (daer hy oock hoof-meester was) ende elders wtgherecht, soo heeft hy sijn leuen ghe-eyndt int iaer 714. ende dat int 29. iaer sijns rijcx. Maer voor sijn doot vergadert hebbende d'opperste vande steden, heeft soo veel ghedaen, dat hy Charel Martel sijnen bastaert sone, aen Alpiadis gewonnen, met consent der seluer ouerheyt, een successeur heeft ghestelt des Hertochdoms van Brabant. Die voorsz. Pipinus is wt dese werelt ghescheyden den xvi. dach der maent Decembris. Int iaer ons Heeren vijc.xiiij. ende wert begrauen in Ioppilien.

Inden tijt van desen Puppijn van ⁺ Herstal, te weten, int iaer 697. hebben die Saracenen dat Coninc-rijck van Granaten in-genomen, ende hebben dat beseten den tijdt van ontrent acht hondert iaeren, tot alsmen schreef duysent vier-hondert negentich. Wanneer Ferdinandus Coninc van Arragon, ende Elizabeth Coninghinne van Spaignien dat wederom wonnen ende in-namen. Maer doen ter tijt wonnen die Heydenen, insghelijcx gheheel Afrijcken, veel Christenen doodende, t'welck sy noch teghenwoordelijck zijn besittende.

+ Innemen van Granaten.