Ansegisvs oft Angiis,
Ende Begga, die tweede Hertoghen van Brabant.
Ga naar margenoot+ANgijs met Begga Grimoalts suster, ende Puppijns van Landen eerste dochter, die tweede Hertogen van Brabandt int iaer 658. hebben geregneert den tijt van ach-en-twintich iaren. Desen H. Hertoch was die sone van S. Arnout, Marchgraue des heylichs rijcx, maer namaels Bischop van Metz. Hy heeft tot eender huysvrouwen ghetrout, die eerveerdighe Princersse Begga, van seer edelen geslachte, ende een moeder van vermaerde Coningen. Sy heeft in Ardennen, tot Anden, liggende tusschen Luydick ende Hoeye, deur goddelijcke reuelatie een Clooster doen bouwen van seuen Kercken, na die seuen Kercken van Roomen, van Edele ionckvrouwen, ende Canonickerssen, al waer sy haren godtvreesenden man Angijs heeft begrauen. Die Begijnen hebben eerst den naem van haer ghecreghen, mits dat sy die Begijnen daer in soude gestelt hebben, alsoo eenighe willen seggen, hoe wel daer af geen groote sekerheyt en is. In welck voorsz. Clooster sy salichlijck inden Heere gestoruen is ende oock begrauen. Maer nv ter tijt wort haer heylich lichaem in grooter, reuerentien gehouden binnen der stadt van Ceulen int Clooster ghenoemt S. Marien, alwaer het nu ter tijdt is rustende. Sy heeft noch een Clooster gefondeert binnen die oude stadt van Landen. Haren Feest-dach wort van de H. Kercke ghecelebreert den 17. dach der maent Decembris. Nu keeren wy weder totten vermaerden Prince Angijs, die welcke Croscum den Coninck der Wandalen, een wreet tyran ende vyant der Christenen, ende haerder leeringen, met gewapender hant victorieuselijc heeft verwonnen in eenen strijt by Trier, den seluen drijuende wt t'lant van Belgis. Ten lesten is desen goeden Prince, int iaer ons Heeren 585. op de iacht seer deyrlijck vermoort gheweest, van eenen Goduino, den welcken hy selue van ioncx af voor sijnen sone hadde op-gevoedt, groot gemaect, ende oock ouer die vunte geheuen, liggende begrauen ter plaetsen bouen verhaelt. Hy heeft eenen sone achterghelaten ghenoemt Puppijn.
Auteursrechtvrij