Chroniicke vande Hertoghen van Brabant

[fol. 23v]

PIPINVS DE LANDIS 1. BRABANTIAE PRINCEPS.

[fol. 24r]

Pvppiin van Landen.
d'Eerste Hertoch van Brabant.

⁺PVPPIIN van Landen, d'eerste van dien name, sone van Carleman, een heylich godtvreesende Prince was, d'eerste Hertoch van Brabant, een prouincie van neder-Germanien, oft Neder-lant, waerom die bouen-ghenoemde Emundus de Dijnter den seluen noemt een Aertsch-hertoch, dat is, d'eerste Hertoch van neder-Austrasien. Ander geuen hem den naem Patriarch van Brabant, ter oorsaecken dat hy als den tweeden Abraham, soo deur sijn selfs neersticheydt, als oock met hulpe ende bystant der godtvreesende Priesteren (die hy was onderhoudende) in Brabant ende inde by-liggende plaetsen, Gode ende de Heylige Kercke veel geestelijcke kinderen heeft gebaert. Seer victorieuselijck heeft hy die Swauen, ende ander landen van Duytsch-landt, met gheweldiger hant t'onder gebracht, ende heeft gheregneert den tijt van dertich iaren. Hy heeft ten houwelijck genomen die dochter des Hertochs van Aquitanien, met name Iduberga, van welcke heylige huysvrouwe hy oock dry kinderen creech, twee dochters, Begga ende Geertruyt, die namaels int ghetal der heyligen ghestelt wert, ende eenen sone met name Grimoaldus. Inden tijdt van desen Puppijn regneerde die groote Coninck van Vranckrijck Lotharis, die welcke int xxx. iaer sijns rijckx ordineerde, dat Puppijn ende sijn na-comers souden wesen die meeste regheerders ende maeckende den eersten Hertoch van Brabant ende neder-Oostenrijck, oft anders genoemt cleyn Lotrijck, liggende tusschen den Rhijn en de Schelt, om dat vanden Coningen van Vranckrijck te leene te houden, waer deur het blijckt, dat die Hoocheyt ende digniteyt der Brabantscher Hertoghen comen is vande Coninghen van Vrancrijck. Oock hadde Puppijn last van t'Coninckx weghen te gouuerneren t'lant vander Eluen totte Moselle, ende dit al mits sijnder wijsheyt, deucht ende ghetrouwicheyt. Hy nam raedt ende assistentie aen S. Arnout Marcgraue ⁺ des heylichs-rijcx, ende namaels Bischop van Metz, om sijn gouuernement bequamer te bedienen, die Coninck Lotharis voorsz. hadde eenen iongen sone, met name Dagobertus, den welcken hy mits sijnder ioncheyt den goeden Hertoch Puppijn ende S. Arnout beual, om hem te regeren, leeren ende bewaren, te meer, om dat hy t'Hertochdom van Brabant voor hem ende voor sijnen erfghenamen vanden Coninck Lotharis ontfangen hadde, alsoo bouen verhaelt is. Desen Lotharis hadde eenen sone, met name Sigebert, die naemaels Coninck wert van oost-Vranckrijck, waer af Metz die hooft-stadt was, desen sone gaf Lotharis oock inde bewaernisse ende regheringhe des voorsz. Hertochs Puppijn. Ende deur den raet vanden voornoemden Grimoaldus, stichte die selue Sigebert Coninck van Vranckrijck, tot verscheyden plaetsen veel Cloosters ende oock Godts-huysen, tot behoef der arme menschen. Maer Grimoaldus wert ten lesten deur haet ende nijt seer iammerlijck vermoort.

Die voorseyde Puppijn quam aen t'Hertochdom int iaer vi^c. xv. Ende is tot Landen salichlijc inden Heere ontslapen, alsmen schreef 645. oft 647. ghelijck andere schrijuen. Al-waer hy begrauen werdt. Maer is naemaels vervoert, ende ghebracht binnen der stadt van Nijuel, liggende aldaer

+ Puppijn I. Hertoch van Brabant

+ S. Arnout.

[fol. 24v]

in een casse, die iaerlijckx inde Cruysdaghen wort omghedragen.

Ick hebbe bouen verhaelt, hoe die Hoocheydt ende digniteyt der Brabandtscher Hertoghen ghecomen is, van die Coninghen van Vranckrijck, maer d'oorsaecke waerom de selue is staende onder den Roomschen Keyser, is, dat die naecomers vanden voorseyden H. Pippino naemaels oock tot dat Kesyerrijck zijn ghecomen, die hun landen onder hare kinderen ghedeylt hebben, sulcx dat Brabant is gebleuen onder de gene die groot Lotrijck ende Almanien te deel hadden. Ende mits dat die Keyserlijcke Croone daer nae vande Coningen van Vrancrijck, op die Roomsche Coninghen, ende totten Duytschen ghecomen is, soo is Brabandt onder dat Keyserrijck ghebleuen tot op desen teghenwoordighen tijdt toe. Eenighe schrijuers, ia treffelijcke ende geloof-weerdighe chronijcken (achterlatende den voorseyden Grimoaldum) stellen Ansegisus ende Begga, die tweede Hertoghen van Brabant, wiens oorden ende ghetal wy hier zijn volgende.

Onder den voorsz. Puppijn gheschieden ⁺ veel wonder teeckenen, men sach veel vier wten hemel vallen. Oock openbaerden hem eenen grooten veruaerlijcken regenboge, wiens gelijc noyt en was gesien geweest, daer een grouwelijcke pestilentie na volchden. Men sach eenen Engel ende een duyuel gaen deur die stadt van Roomen voor allen huysen, ende alsoo menigen slach als de duyuel deur last vanden Engel met eenen vleugel op die deure sloech, soo veel menschen storuen in dat huys. Oock is in desen tijdt int iaer 600. oft naer t'schrijuen van Carrion 630. op-ghestaen die valsche Propheet Mahomet, een voorlooper van Antichrist.

+ Teeckenen inde locht.