Declaratie van dese nauolghende Epistele.
ALs Iason in Colchos ghecomen was, eñ vriendelijcken van Oeta Medeas vadere ontfangen was, ende Medea werdt met sijnder liefden ontsteken, soo datse hem leerde in wat manieren dat hy aen het ghulde vlies geraken mochte dwelck gecreghen hebbende, is met Medea heymelijc nae huys gheuaren. Medeas vadere verstoort sijnde, heeft haer veruolcht: ende Medea hadde haren ionghen broeder Absyrtum met haer genomen, den welcken sy gedoot heeft, ende heeft sijn leden van een ghesneden ende die met stucken inden wech gheworpen, op dat haer vader die haer was veruolgende, oprapende de leden, haer niet achterhalen en soude. Ende so is Medea met Iason in Thessalien vry en vranck ghecomen. Daer nae heeft Iason om sommige saken Medeam verlaten, ende heeft ghetrout Creusam de dochter van Creon, Coninck van Corinthien: hierom Medea rasende van quaetheyt, heeft desen brief geschreuen hem veel quaets verwijtende.