Het triumph-hofjen Iesu Christi ende Marie

[p. 44]

Het V. deel.

1.

V Mijne siele wilt aenschouwen
Vwen beminden Iesu soet,
Hoe hy uytcomt met groot benouwen,
Siet hoe hem is uyt-parst sijn bloedt.

2.

Van't geesselen seer jammerlijcke,

En op sijn hooft een doorne kroon,
Sijn handen sijn te wreedelijcken
Ghebonden, en soo stelt ten toon.

[p. 45]

 

3.

 

My dunckt ick sien u staen o Heere

 

En hoor't gheroep der Ioden aen,

 

Cruys hem, Cruyst hem, met groot oneere

 

Doet hem wech uyt ons ooghen gaen.

 

4.

 

Waer sijt ghy o Maria pure,

 

Bedroefde Moeder hoort ghy wel,

 

Hoe dat de Ruyters deser ure,

 

Wt rijden op haer Paerden snel.

 

5.

 

Hoor hoe sy blaesen langhs de straten,

 

Op haer Trompetten met ghedruys,

 

S'hebben u Soone die sy haten

 

Gheladen met een sware Cruys.

 

6.

 

Nu mach hy wel met rechte seggen,

 

Ick ben een worrem maer geen mensch

 

Want hy blijft moede neder legghen,

 

En wordt gheslaghen nae haer wensch.

 

7.

 

Soo dat hy deerelijck moet kruypen

 

Vermoeyt, nae Calvarien heen

 

Daer sy spottende neder stuppen,

 

En setten hem op eenen steen.

 

8.

 

 

Ach hoe bedruckt, ende bebloedigh,

 

Sit hy daer op Golgathas klip

 

Ghekleet als een arm mensch weemoedigh

 

In een verscheurden Purper stip.

 

9.

 

Het ijsselijck ghekrangh der Ioden

 

Ghedoocht niet dat sijn Moeder hem

[p. 46]

 

Eens spreken magh, maer hem te dooden

 

Roepen sy in ghemeene stem.

 

10.

 

Och dat ick soo veel droeve tranen

 

Kond storten, als ghy doet u bloedt,

 

Heere ick sou mijn hert vermanen

 

Dat sy uytliet een grooten vloedt.

 

11.

 

Mochtans ick sal u niet verlaten,

 

Maer sal u met een droef ghesucht,

 

Op't Cruys sien nag'len, door de gaten

 

Die sy dus booren, met gherucht.